A FGE puxo en marcha, en setembro de 2020, un ciclo de encontros virtuais co obxectivo de explicar á administración galega tanto as iniciativas levadas a cabo pola UE en resposta á crise sanitaria, como as estratexias políticas e programas de financiamento que a UE estaba deseñando para a súa aplicación durante o período 21-27. 

Agora que os piares da recuperación xa están afianzados e a posta en marcha dos diferentes programas de financiamento xa é unha realidade, os encontros virtuais permanecen como un foro de debate coas institucións europeas, establecido pola FGE para trasladar mensualmente á administración autonómica aquelas prioridades europeas con maior repercusión en Galicia. As transicións verde e dixital, a cuestión demográfica ou a reforma do marco normativo de axudas estatais foron algúns dos múltiples temas tratados ata o de agora da man de diversos representantes das institucións europeas.

Co ánimo de fomentar as sinerxías con estes actores comunitarios, en cada encontro virtual tamén se relata a experiencia galega, mostrando así como se traslada na nosa rexión o requirido a nivel europeo. En 2024, a FGE seguirá organizando estes encontros guiándose polas prioridades marcadas na axenda europea.