—O pasado 6 de xullo publicouse o cadro europeo de indicadores da innovación 2023 e o cadro de indicadores da innovación rexional.

—Ambos instrumentos amosan que, malia as recentes crisis, os Estados membros da UE e as súas rexións seguen mellorando os seus resultados en materia de innovación.

Bruxelas, 6 de xullo de 2023. O cadro europeo de indicadores da innovación de 2023 pon de relevo unha mellora substancial dos resultados en materia de innovación de aproximadamente o 8,5 % desde 2016, o que confirma o compromiso da UE co fomento dunha cultura da innovación. Os resultados en materia de innovación de 25 países melloraron durante este período, aínda que a un ritmo máis lento nos últimos anos, e 20 Estados membros aumentaron significativamente as súas capacidades de innovación durante o ano pasado, mentres que só sete rexistraron un descenso. Con todo, os países con sistemas de innovación menos sólidos adoitan mellorar menos rapidamente que a media da UE.

O cadro de indicadores da innovación rexional tamén sinala unha mellora dos resultados en materia de innovación na maioría das rexións da UE dende 2016. Aínda que as rexións innovadoras adoitan estar situadas nos países máis innovadores, atópanse algunhas «bolsas de excelencia» rexionais en países que presentan resultados relativamente inferiores en materia de innovación.

A nivel mundial, a UE segue obtendo resultados lixeiramente mellores que China, e está a reducir a brecha de rendemento con respecto a Australia, aínda que se ampliou con respecto a Canadá, a República de Corea e os Estados Unidos.

Principais conclusións

En función dos seus resultados, os Estados membros divídense en catro grupos de rendemento: líderes en innovación (o rendemento é superior ao 125 % da media da UE), grandes innovadores (entre o 100 % e o 125 % da media da UE), innovadores moderados (entre o 70 % e o 100 % da media da UE) e innovadores emerxentes (por baixo do 70 % da media da UE). Dinamarca é o novo máximo innovador, mentres que Suecia, que ocupara ese posto nos últimos anos, pasa á segunda posición. Outros líderes en innovación son Finlandia, os Países Baixos e Bélxica.

En comparación coa edición do ano pasado, a distribución dos Estados membros entre os grupos de rendemento mantívose estable en liñas xerais. Hungría ascendeu a un grupo de maior rendemento e pasou a ser un innovador moderado, mentres que os resultados en materia de innovación diminuíron en Francia e Luxemburgo dende 2016. En particular:

• Austria, Alemaña, Luxemburgo, Irlanda, Chipre e Francia son grandes innovadores e presentan resultados superiores á media da UE.
• Estonia, Eslovenia, Chequia, Italia, España, Malta, Portugal, Lituania, Grecia e Hungría son innovadores moderados.
• Croacia, Eslovaquia, Polonia, Letonia, Bulgaria e Romanía son innovadores emerxentes.

A nivel rexional, os resultados en materia de innovación melloraron en 211 rexións do total de 239 rexións durante o período transcorrido desde 2016, como se mostra no cadro de indicadores da innovación rexional de 2023. A rexión máis innovadora de Europa é Hovedstaden (Dinamarca), seguida de Helsinqui-Uusimaa (Finlandia) e Oberbayern (Alemaña). Estocolmo (Suecia) ocupa o cuarto posto e Berlín (Alemaña), o quinto.

A pesar dos avances, a brecha en materia de innovación da UE persiste e caracterízase principalmente por estar concentrada xeograficamente. Mentres que os líderes en innovación e a maioría dos grandes innovadores atópanse principalmente en Europa setentrional e occidental, moitos dos innovadores moderados e emerxentes atópanse en Europa meridional e oriental.

Esta liña divisoria resalta a necesidade de realizar esforzos específicos para colmar a brecha en materia de innovación e fomentar un crecemento equitativo en toda a UE, o cal é un dos obxectivos da Nova Axenda Europea de Innovación, que foi adoptada en xullo de 2022. A través de iniciativas estratéxicas, como a Iniciativa sobre o talento para a tecnoloxía profunda, a Plataforma de Talentos para a Innovación e os vales rexionais de innovación, a UE pretende fomentar a innovación de tecnoloxía profunda e promover unha cultura de empresas emerxentes. Ao investir en talento para a tecnoloxía profunda, fomentar ecosistemas de innovación e aproveitar os puntos fortes rexionais, os países e as rexións poden impulsar o progreso tecnolóxico e manter unha vantaxe competitiva no panorama mundial da innovación.

Contexto

Dende 2001, o cadro europeo de indicadores da innovación foi a referencia para analizar os resultados en materia de innovación nos países da UE, os veciños da Unión e os competidores a nivel mundial. O cadro de indicadores da innovación rexional ofrece unha avaliación comparativa dos resultados en investigación e innovación en 239 rexións de 22 Estados membro da UE e de Noruega, Reino Unido, Serbia e Suíza. Chipre, Estonia, Letonia, Luxemburgo e Malta están incluídos a nivel de país. Ámbolos dous cadros de indicadores ofrecen unha avaliación exhaustiva dos puntos fortes e débiles da innovación a escala nacional e rexional, o que permite aos países detectar os aspectos mellorables. Xunto cunha ferramenta interactiva, os cadros de indicadores ofrecen comparacións adaptadas para o usuario, ao visibilizar perfís de países, mostrar puntos fortes e débiles e tendencias relativas, e estudar correlacións entre indicadores.

O cadro europeo de indicadores da innovación pon de relevo o compromiso da UE e os seus Estados membros de fomentar unha innovación arraigada na excelencia, a competitividade, a apertura e o talento. Serve de guía para configurar políticas que amplíen a innovación en toda Europa, mantendo ao mesmo tempo o ritmo da rápida evolución do panorama mundial.

Máis información: Comisión Europea