— O proxecto Eurocidade 2030 está financiado polo programa de financiamento europeo Poctep (Programa de Cooperación Transfronteriza Interreg España-Portugal).

— Eurocidade 2030 pretende reforzar as accións de cooperación transfronteiriza desenvolvidas pola AECT Eurocidade Chaves-Verín.

Santiago de Compostela, 30 de novembro de 2023. A Fundación Galicia Europa participa como socia no proxecto Eurocidade 2030, co obxectivo de promover a cooperación transfronteiriza Galicia-Norte de Portugal. O proxecto prioriza a superación dos obstáculos fronteirizos mediante un enfoque de goberno multinivel. Ademais, céntrase nos retos compartidos por ambas as rexións, como o envellecemento da poboación e o descenso demográfico, que afectan directamente á mocidade, o que lles obriga a buscar oportunidades fóra destas rexións.

Dúas das actividades fundamentais da Eurocidade son Xuventude 2030 e Cidadanía 2030. A primeira busca mellorar a cooperación institucional dos servizos transfronteirizos para favorecer a inclusión da mocidade. A segunda reforza a colaboración administrativa e crea ferramentas que consoliden a cidadanía transfronteiriza.

Ademais da Fundación Galicia Europa, son socios do proxecto a Eurocidade Chaves-Verín, AECT; a Dirección Xeral de Xuventude, Participación e Voluntariado; o Instituto Portugués de Deportes e Xuventude; e a Federación Nacional de Asociacións Xuvenís.

Obxectivos da Eurocidade 2030

O proxecto presta especial atención á inclusión da mocidade a través da coordinación institucional dos servizos transfronteirizos. Así o reflicte a actividade desenvolvida o pasado 14 de novembro, na que a Fundación Galicia Europa creou un espazo de encontro entre mozos e mozas no que desenvolver proxectos orientados á busca de oportunidades nas rexións transfronteirizas.

Ao mesmo tempo, a iniciativa Eurocidade 2030 busca reducir os custos fronteirizos para a poboación do territorio da Eurocidade Chaves-Verín, mediante a cooperación, promovendo unha Eurocidade inclusiva e sostible. A consecución deste obxectivo pasa por aumentar a capacidade desta AECT mediante a consolidación das súas estruturas institucionais e da formación.

En definitiva, o proxecto reforza a capacidade de funcionamento e intervención da AECT Eurocidade Chaves-Verín. Os resultados esperados son os seguintes:

• A consolidación da Eurocidade Chaves-Verín como instrumento de desenvolvemento sostible e integrador.
• Mellorar a calidade de vida dos cidadáns da Eurocidade de Chaves-Verín e a súa contorna.
• Unha cidadanía máis activa e participativa na construción da Eurocidade.

Contexto

O obxectivo xeral da Eurocidade 2030 está aliñado co do programa Poctep (Programa de Cooperación Transfronteriza Interreg España-Portugal), que busca promover a posta en valor e o atractivo dos territorios transfronteirizos e contribuír ao benestar dos cidadáns que viven ou desexan vivir neles. Tendo en conta isto, o proxecto pretende reforzar as accións de cooperación transfronteiriza desenvolvidas pola AECT Eurocidade Chaves-Verín, promovendo os avances institucionais en materia de cultura, demografía, acción social e transporte.

Por outra banda, o obxectivo específico é reforzar a eficacia da administración pública, promovendo a cooperación xurídica e administrativa entre a cidadanía, os axentes da sociedade civil e as institucións, en particular co obxectivo de resolver os obstáculos xurídicos e doutro tipo nas rexións.

Máis información: Eurocidade 2030