Futuro orzamento europeo

En pleno debate sobre o Marco Financeiro Plurianual (MFP) post 2027, Galicia traballa para defender os intereses da comunidade e para que conte cun orzamento forte que sitúe ás rexións no centro do seu deseño e aplicación. Estas son as accións máis relevantes levadas a cabo por Galicia desde que a Comisión Europea presentou a súa proposta:

⇒ En xullo de 2025 coñeceuse a proposta da Comisión Europea do MFP 2028-2034. Consulta aquí a valoración da proposta desde unha perspectiva galega.

⇒ O 3 de outubro, o Consello Galego de Pesca aprobou por unanimidade un ditame sobre o impacto da proposta no sector pesqueiro, no que reclama o mantemento dun fondo específico para a pesca, cunha dotación suficiente e aliñado coa Política Pesqueira Común. Ademais, rexeita a integración do FEMPA nun macrofondo multisectorial, xa que podería reducir a visibilidade, a capacidade de investimento e o apoio a un sector estratéxico para a economía azul galega. Consulta aquí a posición do sector pesqueiro galego apoiada pola Xunta de Galicia.

⇒ O 15 de outubro, o Comité das Rexións adopta por unanimidade unha resolución sobre esta cuestión, e a Alianza pola Cohesión, da que forma parte a Xunta de Galicia, realiza un chamamento para revisar a reforma da política de cohesión.

⇒ O 21 de outubro celebramos en Santiago unha reunión excepcional da delegación española do Comité das Rexións, presidida daquela polo presidente da Xunta de Galicia, Alfonso Rueda, na que se adoptou a Declaración Galicia. Neste boletín podes ver o seguimento que fixemos da declaración.

⇒ O 5 de novembro organizamos unha reunión no Parlamento Europeo coa EURegions4Cohesion.

⇒ O 29 de setembro de 2026, Galicia participou na terceira reunión política da coalición EURegions4Cohesion. O bxectivo central do encontro foi reforzar a posición das rexións nas negociacións que o Parlamento Europeo mantén sobre os futuros Plans de Colaboración Nacional e Rexional (PCNR), instrumentos chamados a xestionar preto da metade do orzamento europeo durante o período 2028-2034. Ademais, elaborouse unha posición común respaldada polas 144 rexións da rede. 

Coa negociación do MFF 28-34 e as regulacións sectoriais xa nas mans dos co-lexisladores, durante 2026 traballamos con cada un deles:

• • A través de emendas redactadas con EURegions4Cohesion, contribuímos ao informe provisional do MFP do Parlamento Europeo, en liña coa última posición desta alianza e da delegación española no Comité das Rexións (Declaración de Galicia). Como resultado, este informe pide unha asignación específica para todas as categorías de rexión, en contraposición á proposta da Comisión, que só reserva unha cantidade para as menos desenvolvidas.
  • Tamén contribuímos ao borrador do informe sobre os PCNR publicado en xuño, que solicita a interacción directa entre as autoridades rexionais de xestión e a Comisión Europea.
  • No CdR, voz oficial das rexións neste debate, participamos na elaboración do ditame sobre o MFP, aprobado polo CdR en marzo de 2026, e nos relativos aos Plans de Colaboración Nacional e Rexional (PCNR), o novo Marco de Rendemento, o FEDER e o FSE, aprobados en maio. Entre outras cuestións, defendemos que as autoridades xesoras rexionais deberían poder seleccionar e establecer os seus propios fitos cualitativos e obxectivos cuantitativos, así como as datas indicativas correspondentes de finalización e os indicadores de rendemento asociados.
  • Reunímonos coa Representación Permanente de España ante a UE para coñecer as discusións no Consello en relación co MFP no seu conxunto e a posición defendida por España.
  • En xuño, organizamos unha comparecencia do Presidente da Xunta de Galicia, Alfonso Rueda, na comisión mixta Congreso-Senado para a UE como presidente saínte da delegación española do CdR, na que instou a comezar a preparar o plan español e a mellorar a coordinación entre o Estado e as CCAA de cara a esta nova programación de fondos.

Galicia leva recibidos máis de 32.000 millóns de euros de fondos europeos desde 1986, o que permitiu modernizar infraestruturas, mellorar servizos públicos e fortalecer a cohesión social. Esta experiencia demostra a importancia de contar cun orzamento europeo sólido, capaz de responder ás necesidades e desafíos dos territorios.

Neste contexto, Galicia defende que o futuro Marco Financeiro Plurianual debe manter políticas fortes e adecuadamente financiadas, preservando o papel das rexións no seu deseño e execución. Isto inclúe garantir o apoio a políticas clave como a cohesión, a pesca, o desenvolvemento rural, a competitividade industrial e a innovación, fundamentais para afrontar retos como o envellecemento demográfico, a transición ecolóxica e dixital, o acceso á vivenda, o equilibrio territorial e o reforzo da base produtiva europea.