En 2025, a Unión Europea combinou avances estratéxicos con desafíos persistentes nun contexto marcado pola incerteza global. A seguridade, a competitividade e a preparación fronte aos novos retos xeopolíticos centraron boa parte da axenda comunitaria, pero para Galicia o gran debate do ano foi o relativo ao próximo Marco Financeiro Plurianual 2028-2034 e ao futuro da política de cohesión.

Neste contexto, Galicia asumiu en febreiro a coordinación da delegación española do Comité Europeo das Rexións, tomando o relevo da Rioxa. Durante este período, a nosa comunidade liderou a elaboración da Declaración Galicia, un texto que reivindica un modelo de xestión compartida que preserve o papel das rexións na definición e execución dos fondos europeos. A Fundación Galicia Europa acompañou este proceso e continuou apoiando a presenza e participación dos representantes galegos nos principais debates europeos, contribuíndo a defender os intereses de Galicia en ámbitos estratéxicos como a pesca, a industria, a enerxía, o medio rural ou a cohesión territorial.

Con TecEuropa continuamos a nosa aposta por fomentar a participación de entidades galegas en proxectos europeos e, como FGE, participamos en diversas iniciativas europeas centradas na mocidade e no desenvolvemento rural. A formación a través das nosas bolsas, a difusión de oportunidades para a mocidade na UE mediante #EuroXuventude e a explicación da actualidade europea a través da nosa web, redes sociais e publicacións completan as actividades desenvolvidas ao longo de 2025.