— O conselleiro de Facenda e Administración Pública, Miguel Corgos, entregou os galardóns da terceira edición e defendeu unha política de cohesión forte, con financiamento suficiente e participación efectiva das rexións

— Tamén resultaron premiados os proxectos CEL_RURAL, Atlantic Youth Creative Hubs (AYCH), o programa YAM, a Residencia de Artistas Artistea e LIFE FLUVIAL

Santiago de Compostela, 6 de novembro de 2026. Polybris foi recoñecido como Proxecto Europeo do ano en Galicia durante a cerimonia de entrega da terceira edición dos Premios #EuropaXunta, celebrada o xoves 5 de novembro no Centro Galego de Arte Contemporánea (CGAC), en Santiago de Compostela.

O proxecto, coordinado desde Galicia polo Instituto Tecnolóxico de Galicia (ITG), é unha iniciativa de economía circular que transforma os residuos plásticos recollidos no mar e nas praias en materiais que contribúen á descontaminación da auga e ao equilibrio ecolóxico do medio mariño. A iniciativa recibiu tamén o premio da categoría #EuropaXunta Intelixente, Competitiva e Dixital.

Os Premios #EuropaXunta, organizados pola Dirección Xeral de Cohesión e Fondos Europeos da Consellería de Facenda e Administración Pública, buscan recoñecer e dar visibilidade aos proxectos que contribúen ao desenvolvemento económico e social de Galicia grazas ao financiamento da Unión Europea.

Seis proxectos recoñecidos en cinco categorías

Ademais de Polybris, o proxecto CEL_RURAL foi premiado na categoría #EuropaXunta Verde e Conectada, mentres que Atlantic Youth Creative Hubs (AYCH), no que participou a Fundación Galicia Europa, recibiu o galardón de #EuropaXunta Educación, Emprego e Inclusión Social. O programa YAM, centrado na promoción da saúde mental e na prevención do suicidio entre a mocidade, foi recoñecido na categoría #EuropaXunta Innovadora e Novidosa.

Na categoría de #EuropaXunta Ámbito Local concedéronse dous premios: un á Residencia de Artistas Artistea, promovida polo Concello de Ponteareas, e outro a LIFE FLUVIAL, pola restauración de hábitats naturais na ría de Ribadeo.

Podes consultar todos os proxectos premiados e candidatos na web dos Premios #EuropaXunta 2026.

Galicia defende unha política de cohesión forte

O conselleiro de Facenda e Administración Pública, Miguel Corgos, felicitou as persoas responsables dos proxectos premiados e lembrou que os fondos europeos continúan sendo un instrumento fundamental para a transformación, modernización e converxencia económica e social de Galicia, con proxectos que contribúen a mellorar a vida das persoas e a xerar novas oportunidades en todo o territorio galego.

Os resultados son a mellor defensa dos fondos europeos, concluíu Corgos, e a mellor forma de garantir a súa continuidade “é demostrar que somos capaces de xestionalos con responsabilidade, eficacia e visión de futuro”.

Por iso, sinalou o conselleiro, Galicia defende unha política de cohesión forte, cun financiamento suficiente e coa participación efectiva das rexións na planificación e na xestión do Marco Financeiro 2028-2034 da Unión Europea.

“A simplificación dos procedementos non pode supoñer unha maior centralización nin unha perda de capacidade de decisión dos territorios”, afirmou Corgos durante o acto de entrega dos premios da terceira edición do concurso #EuropaXunta, que pon en valor as actuacións das administracións galegas co apoio da UE.

O conselleiro de Facenda advertiu que os fondos non producen resultados «por si sós», senón que é preciso identificar as necesidades, seleccionar proxectos de calidade e contar coa capacidade de xestión necesaria para executalos correctamente, “no que Galicia ten unha ampla experiencia”.

Miguel Corgos avanzou que a Xunta xa está a preparar a súa estratexia para 2028-2034, identificando os investimentos e as reformas prioritarios e traballando na elaboración dun posible capítulo rexional. A pesar das incertezas sobre a configuración dos novos instrumentos financeiros, “queremos chegar ao próximo período cunha planificación sólida, adaptada ás necesidades de Galicia e preparada para aproveitar ao máximo as oportunidades de financiamento europeo”.

Máis información: Xunta de Galicia

Revive aquí a cerimonia completa de entrega dos Premios #EuropaXunta 2026: