— Os primeiros proxectos galardoados co Selo STEP teñen como obxectivo desenvolver tecnoloxías limpas de vangarda centradas na enerxía e na industria e tecnoloxías dixitais para aplicacións relacionadas co espazo.

— De entre os proxectos seleccionados, pódese atopar un desenvolvido en Galicia.

Bruxelas, 9 de decembro de 2024. A Comisión publicou os primeiros proxectos aos que se lles concedeu un selo da Plataforma de Tecnoloxías Estratéxicas para Europa (STEP), un selo de calidade que dá maior visibilidade a proxectos prometedores en tecnoloxía limpa e eficiente no uso dos recursos, e tecnoloxía profunda e dixital. Esta etiqueta axudará a atraer financiamento e servizos de apoio públicos e privados adicionais da UE.

Os primeiros 130 proxectos galardoados co Selo STEP teñen como obxectivo desenvolver tecnoloxías limpas de vangarda centradas na enerxía e na industria (Fondo de Innovación) e tecnoloxías dixitais para aplicacións relacionadas co espazo (Horizonte Europa/Espazo). Algúns exemplos de innovacións de vangarda son o desenvolvemento de compoñentes para torres eólicas mariñas (Polonia), o primeiro servizo de transporte marítimo impulsado por células de hidróxeno (Países Baixos), a fabricación de módulos fotovoltaicos (Italia), as tecnoloxías de captura de CO2 para almacenamento (Dinamarca) e os circuítos integrados resistentes á radiación para aplicacións no espazo (varios países). De entre os proxectos galardoados se atopa un localizado en Gándaras (Lugo), dedicado á fabricación de equipos para xeración e almacenamento de enerxía.

A Comisión Europea concede os selos STEP a todos os proxectos que contribúan aos obxectivos de STEP e que cumpran os requisitos de calidade das convocatorias de propostas no marco de cinco programas financiados polo orzamento da UE: Fondo de Innovación, programa Europa Dixital, Fondo Europeo de Defensa, programa UEproSaúde e Horizonte Europa.

Os proxectos galardoados cun selo STEP están listados no Portal STEP. A Comisión promoverá activamente estes proxectos entre os organismos de financiamento público, por exemplo, as autoridades de xestión dos fondos da política de cohesión e dos plans de recuperación e resiliencia dos Estados membros, e entre os investidores privados.

De forma máis específica, anímase os Estados membros a apoiar os proxectos aos que se lles concedeu un selo STEP:

• No marco dos Fondos da Política de Cohesión (FEDER, FSE+): As autoridades de xestión dos Estados membros poden acelerar a selección de proxectos e conceder axudas directamente aos proxectos aos que se lles concedeu o selo STEP, se as operacións entran no ámbito de aplicación do fondo, cumpren o programa da política de cohesión e contribúen aos seus obxectivos específicos.
• No marco do Mecanismo de Recuperación e Resiliencia: Os proxectos serán considerados prioritarios para o financiamento cando os Estados membros revisen os seus plans de recuperación e resiliencia.
• No marco do Fondo de Modernización: Os proxectos poderían ser considerados prioritarios polos Estados membros.
• No marco de InvestEU: Na súa “revisión de políticas”, a Comisión terá en conta estes proxectos e os socios executores examinaránnos oportunamente.

Como distintivo de distinción, o Sello STEP debería axudar aos proxectos a atraer financiamento privado, en particular de investidores que busquen proxectos de risco cun forte perfil ambiental, social e de gobernanza (ESG).

Ademais, os servizos de asesoramento promovidos no marco de STEP, como o asesoramento empresarial e as oportunidades de emparellamento, están destinados a acompañar aos promotores de proxectos nas distintas etapas dos seus proxectos.

Contexto

A Plataforma de Tecnoloxías Estratéxicas para Europa (STEP) foi creada pola UE para apoiar a industria europea e impulsar a inversión en tecnoloxías críticas en Europa. STEP eleva e dirixe a financiación de once programas da UE existentes a tres ámbitos de investimento específicos: Tecnoloxías dixitais e innovación en tecnoloxía profunda; Tecnoloxías limpas e eficientes no uso dos recursos, e biotecnoloxías. STEP tamén apoia proxectos que desenvolven as habilidades necesarias para desenvolver esas tecnoloxías críticas. Un proxecto STEP debe aportar un elemento innovador, emerxente e de vangarda ou contribuír a reducir ou previr as dependencias estratéxicas da Unión. O Regulamento polo que se establece STEP entrou en vigor en marzo de 2024.

En outubro de 2024, a Comisión seleccionou 85 proxectos innovadores de cero emisións netas para recibir 4.800 millóns EUR en subvencións (que cobren como máximo o 60 % de todos os custos) en total do Fondo de Innovación no marco da convocatoria de propostas de 2023. Todos os proxectos recibiron un selo STEP. Outros 64 proxectos non financiados tamén recibiron un selo STEP, e 39 deles aceptaron que a Comisión Europea publicara a súa información.

O 21 de novembro de 2024, a Comisión seleccionou seis proxectos para recibir un total de 18,2 millóns EUR de Horizonte Europa (pilar II) no marco dun tema específico STEP da convocatoria de investigación espacial 2024. Os proxectos seleccionados recibiron un selo STEP e poden consultarse aquí (no tema HORIZON-CL4-2024-SPACE-01-73 – “Tecnoloxías espaciais para a non dependencia e a competitividade europeas”).

Fonte: Comisión Europea

Máis información: 

• Portal de STEP
• Lista de proxectos galardoados co Selo STEP
• Análise FGE