Bruxelas, 14 de marzo de 2022.- O Consello da UE, na súa formación de Xustiza e Asuntos de Interior, adoptou o pasado 3 de marzo a modificación da Directiva sobre os axentes carcinóxenos e mutáxenos, lexislación encamiñada a protexer ás persoas traballadoras contra os riscos das substancias químicas perigosas.

 

O Consello e o Parlamento concluíran en decembro un acordo sobre a actualización desta Directiva, que aprobou o pleno do Parlamento o pasado 17 de febreiro. Agora, coa adopción do Consello, dáse luz verde definitiva á modificación deste acto lexislativo, que mellorará a protección dos traballadores ao establecer límites de exposición para o acrilonitrilo, os compostos de níquel e reducir os límites existentes para o  benceno. Así mesmo, ofrecerase maior protección contra as reprotoxinas, substancias químicas que poden interferir no aparello reprodutivo humano e que se trataban ata o de agora conforme unha lexislación diferente.

 

A modificación desta Directiva supón unha importante vitoria para a seguridade dos traballadores, xa que, con máis de 100.000 mortes ao ano, os cánceres profesionais son a principal causa de morte no traballo na UE, e moitas máis persoas sofren problemas de fertilidade como consecuencia da exposición a substancias canceríxenas ou  reprotóxicas. Segundo datos da Comisión, estímase que estas novas normas reducirán a exposición a axentes canceríxenos dun millón de traballadores.

 

De conformidade coa Directiva revisada, encomendouse á Comisión que presente, como moi tarde o 31 de decembro de 2022, un plan de acción para fixar novos valores límite de exposición profesional, ou revisalos, para polo menos 25 substancias, grupos de substancias ou substancias xeradas por procesos, e que presente propostas lexislativas, se procede.

 

Os Estados membros dispoñen de dous anos a partir da adopción da directiva para adecuarse aos cambios acordados. En España, este proceso implica as correspondentes modificacións do ordenamento xurídico, como a máis recente que tivo lugar coa publicación do Real Decreto 427/2021.

 

Segundo os datos da Comisión, máis dun millón de traballadores vese exposto ao  acrilonitrilo, aos compostos de níquel e ao  benceno, e o 52% das mortes laborais anuais na Unión Europea débense ao cancro.

 

A revisión desta Directiva é a cuarta en 5 anos, tras as tres primeiras que se adoptaron en 2017 e en 2019, e enmárcase en el Plan Europeo de Loita contra o Cáncer e no novo Marco Estratéxico de Seguridade e Saúde no Traballo 2021-2027, que define as prioridades e accións clave para mellorar a seguridade e saúde da poboación traballadora, abordando os rápidos cambios na economía, a demografía e os modelos de traballo.

 

 

 

 

 

 

Máis información: Consejo Europeo