— Segundo estas previsións, o PIB real da UE crecerá un 1,4 % en 2025 e 2026, e alcanzará o 1,5 % en 2027. Agárdase que a zona euro siga unha tendencia similar

Bruxelas, 17 de novembro de 2025. As previsións económicas de outono de 2025 da Comisión Europea indican que o crecemento nos tres primeiros trimestres do ano superou as expectativas. Aínda que os bos resultados se deberon inicialmente a un aumento das exportacións ante a previsión de subas arancelarias, a economía da UE continuou medrando no terceiro trimestre. De cara ao futuro, prevese que a actividade económica siga avanzando a un ritmo moderado ao longo do período de previsión, a pesar do complicado contexto internacional.

Segundo estas previsións, o PIB real da UE crecerá un 1,4 % en 2025 e 2026, e alcanzará o 1,5 % en 2027. Agárdase que a zona euro siga unha tendencia similar, cun crecemento do PIB real do 1,3 % en 2025, do 1,2 % en 2026 e do 1,4 % en 2027. Prevese tamén que a inflación na zona euro continúe diminuíndo ata o 2,1 % en 2025 e que fluctúe arredor do 2 % durante o período analizado. No conxunto da UE, a inflación manterase lixeiramente por riba, baixando ao 2,2 % en 2027.

O consumo privado e o investimento impulsan o crecemento

Os indicadores empresariais e os datos das enquisas máis recentes apuntan a un ritmo positivo e sostido nos próximos trimestres. A máis longo prazo, o contexto global seguirá a ser complexo, pero prevese que a resiliencia do mercado laboral, a mellora do poder adquisitivo e unhas condicións de financiamento favorables sigan apoiando un crecemento económico moderado.

Ademais, o Mecanismo de Recuperación e Resiliencia e outros fondos da UE están amortecendo o impacto do saneamento fiscal en varios Estados membros. Este apoio reforza a demanda interna, chamada a ser o principal motor do crecemento durante o horizonte de previsión. O consumo privado medrará de forma constante, sustentado nos factores mencionados e tamén nun descenso gradual da taxa de aforro. Prevese que o investimento recupere impulso, especialmente na construción non residencial e no investimento en equipamento.

A economía da UE, moi aberta, continúa a ser vulnerable ás restricións comerciais en vigor. Non obstante, os acordos comerciais alcanzados entre os Estados Unidos e diversos socios, incluída a UE, aliviaron algunhas das incertezas que pesaban sobre as previsións de primavera.

As previsións parten do suposto de que todos os aranceis aplicados pola Administración estadounidense a países e sectores específicos ata o 31 de outubro se manterán durante todo o período de análise. A nivel global, as barreiras comerciais acadan máximos históricos e a UE enfróntase agora a aranceis medios sobre as exportacións aos Estados Unidos máis elevados ca os estimados na primavera de 2025. Aínda así, os aranceis ás exportacións europeas seguen sendo inferiores aos aplicados a outros grandes actores mundiais, o que supón unha pequena vantaxe relativa, aínda que enmarcada nun contexto de debilidade do comercio mundial e dun euro forte que modera a demanda externa.

Prevese que a inflación se estabilice

A inflación na zona euro revisouse lixeiramente á alza respecto das previsións de primavera. Agora espérase que diminúa do 2,4 % en 2024 ata acadar o obxectivo do BCE do 2 % en 2027. As tendencias varían segundo o compoñente: o aumento da inflación enerxética compénsase coa caída dos prezos dos servizos e dos insumos. A intensificación das presións competitivas procedentes das importacións e a apreciación do euro deberían moderar a inflación dos bens non enerxéticos. Prevese que a inflación global no conxunto da UE sexa lixeiramente superior á da zona euro, diminuíndo do 2,6 % en 2024 ao 2,2 % en 2027. Estas previsións supoñen que o novo réxime de comercio de dereitos de emisión da UE (RCDE2) entre en vigor en 2027, tal como está acordado.

As taxas de desemprego seguen diminuíndo

A desaceleración gradual do crecemento do emprego iniciada en 2022 continuou na primeira metade de 2025. Aínda así, a economía da UE xerou 380.000 empregos nese período. Prevese que o emprego continúe medrando a un ritmo moderado do 0,5 % en 2025 e 2026, antes de desacelerar ao 0,4 % en 2027. A taxa de desemprego seguirá diminuíndo, pasando do 5,9 % en 2025 e 2026 ao 5,8 % en 2027. O crecemento salarial ralentizarase, pero manterase por riba da inflación, mellorando lixeiramente o poder adquisitivo dos fogares.

Prevese un incremento dos déficits públicos

Espérase que o déficit das administracións públicas da UE aumente do 3,1 % do PIB en 2024 ao 3,4 % en 2027 —debido en parte ao incremento do gasto en defensa do 1,5 % ao 2 % do PIB—, segundo a clasificación COFOG.

A ratio débeda/PIB da UE aumentará do 84,5 % en 2024 ao 85 % en 2027, mentres que na zona euro subirá aproximadamente do 88 % ao 90,4 %. Isto reflicte os déficits primarios actuais e o feito de que o custo medio da débeda pública supera o crecemento nominal do PIB. En 2027, catro Estados membros terán unha ratio de débeda superior ao 100 % do PIB.

O difícil contexto global continúa a afectar ás perspectivas

De cara ao futuro, os riscos para o crecemento parecen diminuír, pero seguen presentes.
A persistente incerteza en materia de política comercial continúa a afectar á actividade económica, e as restricións arancelarias e non arancelarias poderían limitar o crecemento máis do previsto.

Unha nova escalada das tensións xeopolíticas podería agravar as perturbacións da oferta. Ademais, unha reavaliación dos riscos nos mercados bursátiles —especialmente no sector tecnolóxico estadounidense— podería afectar á confianza dos investidores e ás condicións de financiamento. Tamén a incerteza política interna podería influír negativamente na confianza. Finalmente, o aumento da frecuencia das catástrofes climáticas podería lastrar o crecemento económico.

Pola banda positiva, os avances sostidos nas reformas e no programa de competitividade, o incremento do gasto en defensa centrado na produción europea e os novos acordos comerciais poderían impulsar a actividade económica máis do previsto.

Contexto

Estas previsións baséanse en supostos técnicos sobre tipos de cambio, tipos de interese e prezos das materias primas ata o 27 de outubro. En canto aos demais datos, incluídas as hipóteses de políticas públicas, téñense en conta todas as informacións dispoñibles ata o 31 de outubro. As previsións parten do suposto de que non haberá cambios de política, salvo que se anuncien e detallen suficientemente.

A Comisión Europea publica cada ano dúas previsións económicas completas —primavera e outono— que abranguen unha ampla gama de indicadores económicos para todos os Estados membros, países candidatos, países da AELC e outras grandes economías avanzadas e emerxentes.

As previsións económicas de primavera de 2026 presentaranse previsiblemente en maio de 2026 e actualizarán as actuais.

Fonte: Comisión Europea

Documento completo: Previsións económicas europeas de outono de 2025