— O martes 26 de marzo tivo lugar o acto de clausura no que participaron os socios do proxecto, a xuventude participante, así como as pemes.

— Pilar del Oro, coordinadora de Euroxuventude, participou en nome da Fundación Galicia Europa, socia do proxecto.

Chaves-Verín, 26 de marzo de 2024. Este martes 26 de marzo tivo lugar na sede da Eurocidade Chaves-Verín, AECT, a presentación dos resultados do proxecto Erasmus+ “Xuventude embaixadora dixital para pemes” (Dyas, nas súas siglas en inglés). O acto final do proxecto reflectiu a relevancia que tivo esta iniciativa entre os mozos e a súa relación coas pemes do territorio.

Neste acto final estiveron presentes, ademais de Eurocidade, os socios do proxecto: Pilar del Oro en representación da Fundación Galicia Europa e António Machado, secretario xeral da Asociación de Desenvolvemento da Rexión do Alto Tâmega – ADRAT.

O acto final do proxecto reflectiu a relevancia que tivo esta iniciativa entre os mozos e a súa relación coas pemes do territorio.

A xornada estivo dividida entre a presentación do traballo desenvolvido polos mozos embaixadores dixitais e a valoración da experiencia coas pemes.

Algúns dos mozos emprendedores, que participaron na acción formativa en marketing dixital para redes sociais, tiveron a oportunidade de presentar o traballo desenvolvido ante as pemes e compartir as súas experiencias ao longo deste proxecto. Posteriormente, algúns representantes das pemes implicadas no proxecto sumáronse ao diálogo e corroboraron a importancia destas actuacións no territorio caracterizado polo mundo rural.

Balance do proxecto

O balance deste proxecto foi moi positivo tanto pola oportunidade formativa que se deu aos mozos como polo diálogo interxeracional e interdisciplinar que se impulsou entre as pemes. Valorouse o intercambio de aprendizaxes para que os coñecementos se transmitisen aos emprendedores para seguir desenvolvendo as súas redes sociais no futuro.

Este proxecto converteuse tamén nun precursor de oportunidades profesionais para os mozos participantes, abrindo novas perspectivas no mundo laboral.

O proxecto “Xuventude embaixadora dixital para pemes” consistiu nunha formación en marketing dixital para redes sociais e unha parte práctica na que os mozos desenvolveron os coñecementos adquiridos nas pemes do territorio.

Proxecto Dyas

Xuventude embaixadora dixital para Pemes (Digital Youth Ambassadors for SMEs-DYAS) é un proxecto aprobado e financiado pola Axencia Nacional Portuguesa Erasmus+ JA. Erasmus+ (2021-2027).

Os principais obxectivos on aumentar as oportunidades laborais e as capacidades persoais dos mozos do rural. A súa finalidade é abordar a transformación dixital e formar a mozos, pemes e institucións implicadas. Os resultados esperados son a mellora da formación e das capacidades profesionais; mellor coñecemento das ferramentas dixitais, integración nas súas comunidades locais e mellora das capacidades das pemes.

Máis información: Proxectos europeos Fundación Galicia Europa