Bruxelas, 2 de agosto de 2024.

O 1 de agosto de 2024 entra en vigor o Regulamento Europeo de Intelixencia Artificial. O Regulamento ten por obxecto fomentar o desenvolvemento e a implantación responsables da intelixencia artificial na UE. Proposto pola Comisión en abril de 2021 e aprobado polo Parlamento Europeo e o Consello en decembro de 2023, o Regulamento de Intelixencia Artificial aborda os posibles riscos para a saúde, a seguridade e os dereitos fundamentais dos cidadáns. Proporciona aos desenvolvedores e implementadores requisitos e obrigacións claros en relación con usos específicos da IA, reducindo ao mesmo tempo as cargas administrativas e financeiras para as empresas.

O Regulamento de Intelixencia artificial introduce un marco uniforme en todos os países da UE, baseado nunha definición prospectiva da IA e un enfoque baseado no risco:

Risco mínimo: a maioría dos sistemas de IA, como os filtros de correo non desexado e os videoxogos baseados na IA, non están suxeitos a ningunha obrigación en virtude do Regulamento de Intelixencia Artificial, pero as empresas poden adoptar voluntariamente códigos de conduta adicionais.

Risco específico de transparencia: os sistemas como os chatbots deben informar claramente os usuarios de que están a interactuar cunha máquina, mentres que determinados contidos xerados por IA deben etiquetarse como tales.

Risco alto: os sistemas de IA de alto risco, como os softwares médicos baseados en IA ou os sistemas de IA utilizados para a contratación, deben cumprir requisitos estritos, incluídos sistemas de redución do risco, conxuntos de datos de alta calidade, información clara para o usuario, supervisión humana, etc.

Risco inadmisible: por exemplo, os sistemas de IA que permiten a «puntuación cidadá» por parte de gobernos ou empresas considéranse unha clara ameaza para os dereitos fundamentais das persoas e, por tanto, están prohibidos.

A UE aspira a ser o líder mundial en IA segura. Ao desenvolver un marco regulamentario sólido baseado nos dereitos humanos e os valores fundamentais, a UE pode desenvolver un ecosistema de IA que beneficie a todo o mundo. Isto implica unha mellor asistencia sanitaria, un transporte máis seguro e limpo e uns servizos públicos mellorados para os cidadáns. Achega produtos e servizos innovadores, en particular nos ámbitos da enerxía, a seguridade e a asistencia sanitaria, así como unha maior produtividade e unha fabricación máis eficiente para as empresas, mentres que os gobernos poden beneficiarse de servizos máis baratos e sostibles, como o transporte, a enerxía e a xestión de residuos.

Recentemente, a Comisión puxo en marcha unha consulta sobre un Código de Boas Prácticas para os provedores de modelos de intelixencia artificial de uso xeral. Este Código, previsto polo Regulamento de Intelixencia Artificial, abordará ámbitos críticos como a transparencia, as normas relacionadas cos dereitos de autor e a xestión de riscos. Convídase os provedores dos modelos de intelixencia artificial de uso xeral que operan na UE, ás empresas, aos representantes da sociedade civil, aos titulares de dereitos e aos expertos académicos a que presenten os seus puntos de vista e conclusións, que se incorporarán ao próximo proxecto de Código de Boas Prácticas da Comisión sobre modelos de intelixencia artificial de uso xeral.

As disposicións relativas aos modelos de intelixencia artificial de uso xeral entrarán en vigor en 12 meses. A Comisión espera finalizar o Código de Boas Prácticas como moi tarde en abril de 2025. Ademais, as observacións da consulta tamén servirán de base para o traballo da Oficina Europea de Intelixencia artificial, que supervisará a aplicación e o cumprimento das normas do Regulamento de Intelixencia artificial relativas aos modelos de intelixencia artificial de uso xeral.

Máis información: 

Entrada en vigor do Regulamento Europeo de Intelixencia artificial: comunicado de prensa

Intelixencia artificial: preguntas e respostas

Máis información sobre o Regulamento Europeo de Intelixencia artificial

Excelencia e confianza na intelixencia artificial

Regulamento de Intelixencia artificial: Díganos o que pensa sobre unha IA fiable de uso xeral

Oficina Europea de IA