— O director xeral de Relacións Exteriores e coa UE interveu durante o pleno 160 do Comité das Rexións para amosar o apoio galego á creación dunha ferramenta para facilitar as relacións entre fronteiras europeas.

— Outras cuestións de relevancia para Galicia durante esta sesión foron os ditames sobre a xestión das poboacións de grandes carnívoros nas zonas rurais europeas ou sobre a regulación dos vexetais obtidos mediante novas técnicas xenómicas.

Bruxelas, 18 de abril de 2024. O director xeral de Relacións Exteriores e coa UE, Jesús Gamallo, participou na sesión plenaria número 160 do Comité Europeo das Rexións (CdR) representando a Galicia. Tratouse dun pleno especialmente interesante para a nosa rexión, que presentou 21 emendas a catro dos ditames sometidos a aprobación.

Un dos máis relevantes para Galicia foi o ditame sobre a ferramenta de facilitación transfronteiriza. Calcúlase que a eliminación do 20% das barreiras e obstáculos xurídicos e administrativos actuais entre rexións de fronteira na UE -entre as que se atopa Galicia, que conforma unha Eurorrexión xunto co Norte de Portugal- permitiría aumentar o seu PIB nun 2% e crear nelas ata un millón de empregos.

O propio director xeral manifestouno así neste pleno: “Galicia mantén importantes relacións económicas, sociais e culturais con Portugal, pero moitas veces vense socavadas por obstáculos derivados das fronteiras, que afectan ao transporte, á prestación de servizos públicos ou ao desenvolvemento empresarial. Por iso apoiamos un mecanismo transfronteirizo como este, que permita superar estas barreiras por medio de puntos de coordinación.”

A coexistencia dos grandes carnívoros coas actividades agrarias

De entre os outros 13 ditames aprobados nesta sesión plenaria, cómpre salientar o relativo á xestión das poboacións de grandes carnívoros en Europa, que destaca a necesidade de lograr un equilibrio entre a protección de especies como o oso, o lince ou -especialmente para Galicia- o lobo, e a dos seres humanos e as actividades agrícolas nas zonas rurais.

Mediante a presentación de 13 emendas a este ditame, a Xunta de Galicia fixo énfase na necesidade de avaliar periodicamente o estado de conservación destas especies para garantir niveis de protección e xestión adecuados, e solicitou un maior apoio público para que as comunidades rurais e os agricultores poidan aplicar medidas de prevención axeitadas e facer fronte aos danos causados por grandes carnívoros.

Ademais dos anteriores, o goberno galego presentou emendas a outros dous ditames: un sobre a primeira proposta de lexislación europea para regular a distribución e comercialización de vexetais producidos mediante os métodos máis novidosos de modificación xenética (coñecidos como “novas técnicas xenómicas”); e outro sobre a promoción da mobilidade na aprendizaxe como ferramenta para impulsar o desenvolvemento das competencias e o talento na UE.

Outros puntos destacados

Este pleno contou, ademais, coa celebración de tres debates políticos de alto nivel sobre o paquete de ampliación da Unión Europea de 2023, os sistemas de protección da infancia a nivel local e rexional e as eleccións ao Parlamento Europeo do vindeiro 9 de xuño. Por vía de urxencia, adoptouse unha resolución sobre a política de cohesión despois de 2027 como resposta ao 9º Informe da Cohesión publicado a finais de marzo.

Os máis de 300 representantes locais e rexionais abordaron tamén os resultados do pasado Cume Europeo de Rexións e Cidades celebrado en Mons, a próxima creación dun órgano interinstitucional de ética da UE e a proposta de orzamento do Comité Europeo das Rexións para 2025.

Comité Europeo das Rexións

O Comité Europeo das Rexións é a asemblea consultiva na que están representados os entes locais e rexionais da Unión Europea. A sesión plenaria do CdR reúnese seis veces ao ano. En representación da Comunidade Autónoma de Galicia, o membro titular é o propio presidente da Xunta de Galicia, mentres que o cargo de membro suplente recae no director xeral de Relacións Exteriores e coa UE.

Máis información: Xunta de Galicia