— Galicia estivo representada en seis citas diferentes da última edición da EU Regions Week, dando continuidade a participación neste evento que iniciou fai máis de dúas décadas. 

— A Fundación Galicia Europa organizou dous seminarios na edición deste 2023, un sobre a intelixencia artificial e outro sobre a industria no marco das transicións verde e dixital.

Bruxelas, 13 de outubro de 2023. A Semana Europea das Rexións e das Cidades (#EURegionsWeek) acaba de deixar atrás a súa vixésimo primeira edición, celebrada entre os días 9 e 12 de outubro. Durante as últimas catro xornadas, Bruxelas albergou os máis de 300 actos do programa do que xa se asentou nas dúas últimas décadas como o maior evento sobre a política de cohesión europea.

A través da Fundación Galicia Europa (FGE), entidade representante da Xunta ante a Unión Europea, Galicia leva participando no evento desde as súas orixes, fai xa máis de dúas décadas, e este 2023 non foi unha excepción. Nesta ocasión, a nosa rexión estivo representada nun total de seis citas, dúas das cales foron organizadas pola FGE, ambas as celebradas o martes día 10.

A Fundación Galicia Europa na EU Regions Week

Na primeira das citas organizadas pola Fundación Galicia Europa abordouse o papel que teñen as rexións europeas no desenvolvemento da intelixencia artificial, creándose o espazo idóneo para expoñer ante o público europeo o traballo que se levou a cabo desde Galicia en relación con esta tecnoloxía. Quedou patente así a aposta da Xunta pola transformación neste ámbito, materializada no traballo da Axencia para a Modernización Tecnolóxica de Galicia (Amtega) e, en particular, no actual proceso de elaboración da lei de planificación, organización e impulso da IA en Galicia e na concesión da primeria axencia estatal de supervisión da IA (AESIA).

O encontro contou coa participación de María Bobillo, a directora de Planificación da Amtega, en calidade de moderadora, e de Beatriz Allegue, xefa de Desenvolvemento Lexislativo da Asesoría Xurídica Xeneral da Xunta, como relatora. Xunto a ela, interviñeron tamén Thomas Wobben, director de Traballos Lexislativos no Comité das Rexións (CdR) e Miguel Valle do Olmo, o conselleiro de Transformación Dixital na Representación Permanente de España ante a UE.

Aínda que nun escenario diferente, tamén puxo ao noso territorio no foco a charla protagonizada por Julio Pombo, director de Impulsa Galicia. Organizada de igual maneira pola Fundación Galicia Europa e baixo o pretexto de retratar a adaptación da industria galega ás transicións verde e dixital, serviu para dar a coñecer algunhas das iniciativas desta sociedade público-privada promovida pola Xunta.

De entre a carteira de proxectos nos que traballa co obxectivo de axilizar iniciativas empresariais tractoras que incidan na transformación económica destaca a construción da primeira planta de Ilyocell de Europa, que verá a luz en Palas de Rei a mans do grupo Altria. A xeración de hidróxeno verde e a recuperación integral e sostible do rural galego son outras dúas das súas prioridades.

Ademais, tras a sesión de peche da Semana Europea das Rexións e das Cidades 2023, a Fundación Galicia Europa participou con outras rexións españolas nunha cata de productos típicos. Organizada no marco da Presidencia española do Consello da UE, achegou a tarta de Santiago, a empanada, os queixos galegos e o viño Ribeiro ao público europeo.

Outra representación galega na EU Regions Week 2023

Ademais de en os dous eventos organizados pola Fundación Galicia Europa, os intereses galegos estiveron tamén representados noutras tres citas. Unha delas contou coa participación de Sagrario Pérez Castellanos, a directora xeneral de Cambio Climático da Xunta, que explicou ante os asistentes como se implementou en Galicia o Pacto das alcaldías. Durante os seus catro anos de vida, a Oficina Técnica de Asistencia a Concellos logrou axuntar a 285 concellos galegos na loita contra o cambio climático desde o ámbito local.

Tamén no seo do programa da Semana Europea de Rexións debateuse sobre as cualificacións profesionais en zonas de fronteira entre países. A perspectiva galego-portuguesa achegouna Nuno Almeida, o director da Agrupación Europea de Cooperación Territorial Galicia-Norte de Portugal, que presentou o proxecto piloto de Formación Profesional Dual Transfronteiriza.

Finalmente, aínda que nun evento paralelo á axenda oficial da EU Regions Week, tamén estivo representado o Clúster Alimentario de Galicia (Clusaga). A entidade galega coorganizou un seminario xunto con Flanders’ FOOD (de Flandes) e AgriFood Capital – FoodNL (de Brabante) no que se deron a coñecer algunhas das iniciativas de cada unha das entidades en materia de innovación agroalimentaria, así como os seus proxectos colaborativos.