- O
director xeral de Relacións Exteriores e coa UE da Xunta de Galicia, Jesús
Gamallo, participou nun debate sobre as redes de transporte europeas desde
unha perspectiva rexional
- Os
representantes locais e rexionais coinciden en reclamar máis
financiamento, fortalecendo o programa do Mecanismo Conectar Europa
- Galicia
pide modificar o Corredor Atlántico para que inclúa á nosa comunidade,
contribuíndo así á conectividade de todas as rexións europeas
Bruxelas, 16
de xuño de 2017. Membros do Comité das Rexións (CdR) participaron
o pasado venres nun debate baixo o título
”Cidades e rexións que desenvolven unha rede transeuropea de transportes
baseada no territorio”, co obxectivo de debater sobre o papel que as
rexións poden desempeñar na integración de Europa. Ao evento asistiron máis de
60 representantes locais e rexionais de toda a Unión Europea, así como
ministros, alcaldes e especialistas en políticas de transporte. O principal
orador foi Antonio Tajani, presidente do Parlamento Europeo, que subliñou que a
Rede Transeuropea de Transporte (RTE-T) desempeña un importante papel no
desenvolvemento e a prosperidade económica, pero require un maior financiamento
para lograr a consecución dos seus obxectivos.
O director xeral de Relacións Exteriores e coa UE da Xunta
de Galicia, Jesús Gamallo, participou no intercambio de ideas, que se celebrou
en Brindisi (Italia). Galicia considera necesario reordenar os corredores
prioritarios da RTE-T, xa que na actualidade ningún deles ten en conta á nosa
comunidade. Esta modificación permitiría a Galicia contar con fondos do
Mecanismo Conectar Europa (MCE), contribuíndo desta maneira ao obxectivo de
cohesión territorial da UE.
A Rede
Transeuropea de Transporte (RTE-T)
As autoridades locais e rexionais reunidas recoñeceron que
o transporte é un dos principais factores para unha economía próspera da UE,
posto que xera comercio, fomenta o crecemento económico e proporciona millóns
de empregos nas rexións e cidades europeas. Neste sentido, a política de RTE-T
territorial da UE –un conxunto planificado de redes de transporte deseñadas
para facilitar a comunicación de persoas e mercadorías–, non só garante a
accesibilidade e a conectividade para todas as rexións da Unión, senón que
axuda á súa competitividade a longo prazo.
No desenvolvemento da RTE-T, o Mecanismo Conectar Europea
(MCE) adoptado en 2013 supón unha peza fundamental, na súa calidade de marco
xurídico común e instrumento de financiamento para o sector do transporte. A
adopción do MCE concibiuse como un instrumento de cofinanciación imprescindible
para a posta en marcha e finalización das infraestruturas e servizos RTE-T. Con
todo, a maioría do financiamento do MCE canalízase cara a proxectos enmarcados dentro
dos corredores prioritarios da RTE-T, que non inclúen á nosa comunidade. O
Corredor Atlántico, polo que deberían pasar as mercadorías desde Galicia a Europa,
exclúe a nosa rexión, como tamén ocorre con outras comunidades do Noroeste de
España. A tal fin, os membros do CdR que acudiron a Brindisi aprobaron unha
declaración, exhortando a renovar o compromiso financeiro do MCE, aumentando a
súa dotación e favorecendo iniciativas destinadas a executar as redes globais e
o sistema de conexión aos corredores da rede básica das RTE-T para construír as
ligazóns que faltan.
Proposta de
Galicia
En 2018 realizarase unha revisión do Regulamento do
Mecanismo Conectar Europa, abrindo a posibilidade de propoñer modificacións á
configuración dos corredores europeos. Galicia defende que se expoña unha
variación do Corredor Atlántico, propoñendo no noso caso unha “antena” que
chegue ata o territorio galego, seguindo as liñas incorporadas na Rede Básica
de transporte de mercadorías por Ferrocarril. Para iso, a nosa comunidade está
a tratar de buscar sinerxias con rexións periféricas similares, como é o caso
da Bretaña Francesa, a través da Comisión Arco Atlántico da Conferencia de
Rexións Periféricas e Marítimas (CRPM). Aínda que desde Galicia deféndase a
modificación do Corredor Atlántico, o peso principal desta iniciativa debe
recaer sobre o Ministerio de Fomento, xa que se trata dunha decisión de Estado
que afecta a infraestruturas de competencia estatal.
É necesario lembrar que a accesibilidade e conectividade de
todas as rexións da Unión e unha cobertura equilibrada do territorio europeo
son obxectivos da RTE-T, tal e como figura no Regulamento da rede, algo que non
se está conseguindo ata agora. Por iso, pídese unha especial reconsideración do
Corredor Atlántico que, na súa actual configuración, dificulta o acceso ás
posibilidades que ofrecen os Regulamentos sobre a RTE-T e o MCE para toda a
zona do noroeste da Península Ibérica e parte da fachada atlántica francesa,
constituíndo un obstáculo para o desenvolvemento desa área. A aceptación da
proposta melloraría as conexións loxísticas intermodais, ao conectar coa rede
transeuropea os portos galegos, e daría servizo ás case 5 millóns de persoas
(10.3% de España) que viven nestas áreas do norte peninsular. Por iso, Galicia
súmase ao compromiso de traballar polo éxito dunha política das RTE-T baseada
no territorio, que conecte aos países do sur cos do norte e aos do leste cos do
oeste en todo o continente europeo, colmando as lagoas entre as redes de
transporte nacionais e eliminando os obstáculos que dificultan o desenvolvemento
económico das rexións e cidades.