Actualidade

Portada » Actualidade » Novas » Galicia na UE » Emprego e Asuntos Sociais » Galicia avoga pola protección do xornalismo local e rexional na lexislación europea

Galicia avoga pola protección do xornalismo local e rexional na lexislación europea

02/02/2023 |

— A proposta da Comisión Europea procura o fomento da independencia e pluralismo nos medios de comunicación europeos, evitando interferencias políticas

Bruxelas, 1 de febreiro de 2023. O director xeral de Relacións Exteriores e coa UE, Jesús Gamallo, participou no primeiro encontro deste ano 2023 da Comisión de Cidadanía, Gobernanza, Asuntos Institucionais (CIVEX) do Comité Europeo das Rexións (CdR). O impacto rexional da Lei europea de liberdade de prensa e a relación cos Estados socios de Europa oriental e o Cáucaso foron os principais temas a tratar na xuntanza. Gamallo, ademais, actuou como coordinador do grupo popular europeo (EPP) na comisión.

O pasado mes de setembro, a Comisión Europea presentou a súa proposta de Lei Europea de Liberdade de Prensa, un instrumento que busca fomentar o pluralismo e a independencia dos medios de comunicación dentro do mercado único. Búscase así asegurar a liberdade dos editores e evitar interferencias políticas. A comisión CIVEX defendeu o rol sociocultural que a prensa ten a nivel rexional e local, manifestando que unha lei centralizadora podería reducir a diversidade cultural. Ademais, o reforzo dos medios de comunicación europeos podería afectar a posición do xornalismo rexional, alterando o mercado único. Por último, a comisión tamén solicitou a inclusión na lei das plataformas dixitais e os algoritmos de publicidade, en beneficio dos usuarios.

O director xeral, Jesús Gamallo, mostrouse a favor das solicitudes feitas pola comisión CIVEX á proposta da Comisión, que a considera unha ferramenta necesaria para os tempos actuais. “A liberdade dos medios de comunicación é un elemento fundamental para a saúde das nosas democracias. Precísase desenvolver unha cooperación europea para que os novos medios de comunicación non se convertan nun altofalante da discordia e as mensaxes de odio”, puntualizou Gamallo. O director xeral puntualizou que estas accións non se poden facer sen ter en conta ás rexións, “xa que a prensa local e rexional promoven e manteñen vivas as culturas, linguas e pobos de toda Europa, polo que deberíamos evitar un exceso de regulación a escala europea”.

Ademais, CIVEX profundou nas conclusións da conferencia de subsidiariedade activa celebrada no mes de novembro, procurando unha maior relevancia das administracións rexionais e locais na toma de decisións comunitaria. Tamén se debateu o actual marco financeiro plurianual, apoiando cuestións como a reconstrución de Ucraína pola invasión rusa ou a atención ás rexións con maior presión migratoria.

A futura ampliación da UE e as relacións co leste, baixo revisión

Por outro lado, a comisión CIVEX revisou o estado actual da Asociación Oriental, formada pola Unión Europea e seis Estados da Europa oriental (Armenia, Acerbaixán, Bielorrusia, Xeorxia, Moldavia e Ucraína), solicitándose unha revisión completa do seu labor. Tamén foron debatidas formas de colaboración entre a UE e os Estados candidatos potenciais.

As comisións CIVEX e NAT do Comité das Rexións

No actual mandato 2020- 2025 do Comité Europeo das Rexións, Galicia participa na Comisión de Recursos Naturais (NAT) e na Comisión de Cidadanía, Gobernanza e Asuntos Institucionais e Exteriores (CIVEX). Esta última elabora ditames en materia de seguridade, liberdade, xustiza, política migratoria e cidadanía, polo que nestes momentos contribúe de maneira fundamental a un dous obxectivos políticos prioritarios dá UE: reforzar a democracia europea.

Buscador

  • Categoría

  • Subcategoría

  • Etiqueta

  • Data