2024, un novo ciclo institucional na Unión Europea

O ano 2024 foi un ano de cambio. As eleccións ao Parlamento Europeo celebradas en xuño deron lugar a un novo ciclo institucional marcado pola inestabilidade mundial. Unha parte importante do traballo da FGE foi dar conta dos cambios institucionais da Unión Europea. Fixémolo a través dun encontro virtual Xunta-UE no que analizamos os retos e oportunidades do novo goberno comunitario, da elaboración dunha ‘Análise FGE’ e dunha campaña en redes animando ao voto en Galicia, especialmente entre a xente nova. O 2024 estivo tamén marcado polo recoñecemento do traballo da Xunta de Galicia a nivel europeo coa obtención de tres premios: o de Rexión Emprendedora Europea, o de Seguridade Viaria polas sendas peonís e ciclistas, e o do Observatorio Europeo de Vixilancia Tecnolóxica á ferramenta de emprego intelixente en Galicia Emi. Con TecEuropa, continuamos a nosa aposta por fomentar a participación de entidades galegas en proxectos europeos e, como FGE, participamos en seis proxectos europeos que teñen á mocidade rural no centro de execución. A formación a través das nosas bolsas, a difusión de oportunidades para a mocidade na UE a través de #EuroXuventude e a explicación da actualidade europea a través da nosa web, redes sociais e publicacións completan estas actividades de 2024.