— A folla de ruta de REPowerEU, presentada onte pola Comisión Europea, marca o camiño para asegurar a plena independencia enerxética da UE respecto de Rusia.

— As medidas están deseñadas para preservar a seguridade do subministro enerxético da UE, limitando ao mesmo tempo calquera impacto nos prezos e nos mercados.

Bruxelas, 7 de maio de 2025. A UE deixará de depender da enerxía rusa poñendo fin á importación de gas e petróleo rusos e eliminando progresivamente a enerxía nuclear procedente de Rusia, garantindo ao mesmo tempo a estabilidade do subministro e dos prezos da enerxía en toda a Unión. A folla de ruta de REPowerEU, presentada onte pola Comisión Europea, marca o camiño para asegurar a plena independencia enerxética da UE respecto de Rusia.

A pesar dos importantes avances acadados no marco do Plan REPowerEU e a través das sancións dende a invasión rusa de Ucraína, en 2024 a UE experimentou unha repunta das importacións de gas ruso. Polo tanto, cómpre tomar medidas máis coordinadas, xa que a excesiva dependencia da UE das importacións de enerxía rusa constitúe unha ameaza para a seguridade.

Nas palabras da presidenta da Comisión, Ursula von der Leyen:
«A guerra en Ucraína revelou de forma brutal os riscos do chantaxe, da coerción económica e das perturbacións dos prezos. Con REPowerEU, diversificamos o noso subministro enerxético e reducimos drasticamente a dependencia de Europa dos combustibles fósiles rusos. Chegou o momento de que Europa corte por completo os vínculos enerxéticos cun provedor pouco fiable. E a enerxía que chega ao noso continente non debe servir para financiar unha guerra de agresión contra Ucraína. Debémosllo á nosa cidadanía, ás nosas empresas e aos nosos valentes amigos ucraínos».

A folla de ruta establece unha eliminación progresiva do petróleo, o gas e a enerxía nuclear rusos dos mercados da UE, que se levará a cabo dun xeito coordinado e seguro a medida que avanzamos na nosa transición enerxética. As medidas están deseñadas para preservar a seguridade do subministro enerxético da UE, limitando ao mesmo tempo calquera impacto nos prezos e nos mercados.

Prevese que a partir de 2025 aumente rapidamente o subministro mundial de GNL, mentres a demanda de gas diminúe. Coa plena aplicación do marco de transición enerxética e do Plan de Acción para unha Enerxía a prezo Asumible, agárdase que a UE substitúa ata 100.000 millóns de metros cúbicos de gas natural ata 2030, o que suporía unha diminución da demanda de entre 40.000 e 50.000 millóns de metros cúbicos ata 2027. Ao mesmo tempo, agárdase que as capacidades de GNL aumenten ata 200.000 millóns de metros cúbicos en 2028, é dicir, cinco veces máis que as actuais importacións de gas ruso na UE.

A folla de ruta presentada onte será seguida o vindeiro mes por propostas lexislativas da Comisión.

Eliminación progresiva, coordinada e gradual do subministro de enerxía rusa

A Comisión traballará cos Estados membros para garantir que a eliminación progresiva das importacións de enerxía rusa a nivel da UE sexa gradual e estea ben coordinada en toda a Unión. Pediráselles aos Estados membros que elaboren plans nacionais antes de finais deste ano nos que expliquen como contribuirán á eliminación das importacións de gas, enerxía nuclear e petróleo rusos.

Todas as medidas irán acompañadas de esforzos continuos para acelerar a nosa transición enerxética e diversificar o subministro, en particular mediante a agregación da demanda de gas e un mellor aproveitamento das infraestruturas, co fin de descartar riscos para a seguridade do subministro e a estabilidade do mercado.

En canto ao gas, as próximas propostas mellorarán a transparencia, a vixilancia e a trazabilidade do gas ruso en todos os mercados da UE. Sobre todo, evitaranse novos contratos con provedores de gas ruso (por gasoduto e en forma de GNL), e os contratos á vista existentes rescindiranse antes de finais de 2025. Deste xeito, a UE terá reducido nun terzo o subministro restante de gas ruso xa a finais deste ano. A Comisión proporá, ademais, poñer fin a todas as importacións restantes de gas ruso antes de finais de 2027.

No marco da folla de ruta, a Comisión tamén presentará novas medidas para facer fronte á “frota na sombra” rusa que transporta petróleo. En canto á enerxía nuclear, as propostas do próximo mes incluirán medidas sobre as importacións rusas de uranio enriquecido, así como restricións aos novos contratos de subministro asinados conxuntamente pola Axencia de Subministración de Euratom (AAE) para o uranio, o uranio enriquecido e outros materiais nucleares procedentes de Rusia. Tamén está prevista unha Iniciativa do Centro Europeo de Radioisótopos para garantir o subministro de radioisótopos médicos na UE mediante o incremento da produción propia.

Contexto

A folla de ruta baséase no Plan REPowerEU, que foi a resposta inmediata da UE fronte ás consecuencias da invasión ilegal de Ucraína por parte de Rusia, presentado en maio de 2022. O Plan confirmou a determinación da UE de eliminar a enerxía rusa, ao tempo que acelera o despregamento das enerxías renovables e mellora o aforro e a eficiencia enerxética.

As medidas adoptadas ata agora conseguiron reducir o volume de gas ruso importado de 150.000 millóns de metros cúbicos en 2021 a 52.000 millóns en 2024, o que supón unha redución do peso das importacións de gas ruso do 45 % ao 19 %. Todas as importacións de carbón ruso foron prohibidas mediante sancións; as de petróleo ruso tamén se reduciron, do 27 % a principios de 2022 ao 3 % na actualidade. No ámbito nuclear, os Estados membros que aínda empregan reactores VVER deseñados por Rusia avanzaron na substitución do combustible ruso por combustible doutras procedencias.

Eliminando gradualmente a enerxía rusa, a folla de ruta de REPowerEU reducirá os riscos para a seguridade aos que se enfronta a Unión. Tamén contribuirá ao plan económico recollido na Compás para a Competitividade, o Pacto por unha Industria Limpa e o Plan de Acción para unha Enerxía a un prezo Asumible, que destacan como un sistema enerxético máis limpo e independente pode impulsar a economía e contribuír decisivamente ás ambicións de descarbonización de Europa.

Fonte: Comisión Europea

Máis información: 

• Preguntas e respostas sobre a folla de ruta