— A Presidencia española comprometida a impulsar unha transición definitiva cara os vehículos limpos para o ano 2035.

— O novo regulamento ten como obxectivo a adecuación normativa en materia de redución de emisións provenientes do transporte por estrada

Bruxelas, 25 de setembro de 2023. O Consello adoptou o 24 de setembro de 2023 a súa posición («orientación xeral») sobre a proposta de Regulamento relativo á homologación de tipo dos vehículos de motor e motores e dos sistemas, compoñentes e unidades técnicas independentes destinados a eses vehículos no que respecta ás súas emisións e á durabilidade das baterías, máis coñecida como Euro 7. O novo Regulamento, que por primeira vez inclúe aos turismos, as furgonetas e os vehículos pesados nun único acto xurídico, ten por obxecto establecer normas máis adecuadas no referente ás emisións dos vehículos e reducir aínda máis as emisións de contaminantes atmosféricos procedentes do transporte por estrada.

“Europa é coñecida en todo o mundo por producir vehículos de baixas emisións e de máxima calidade. Queremos seguir perseguindo o obxectivo de mellorar a calidade do aire. A nosa posición consiste en manternos na senda de liderar a mobilidade do futuro e adoptar uns niveis de emisións realistas para os vehículos da próxima década, axudando ao mesmo tempo á nosa industria para dar o salto definitivo cara aos vehículos limpos en 2035. A Presidencia española foi sensible ás distintas demandas e peticións dos Estados membro, e consideramos que con esta proposta conseguimos un apoio amplo e un equilibrio nos custos de investimento das marcas de fábrica, ademais de mellorar os beneficios ambientais derivados do Regulamento.” – Héctor Gómez Hernández, ministro en funcións de Industria, Comercio e Turismo de España

A posición do Consello logra un equilibrio entre requisitos estritos en materia de emisións dos vehículos e investimentos adicionais para a industria, nun momento no que os fabricantes europeos de automóbiles están a experimentar unha transformación cara á produción de vehículos de emisión cero. A orientación xeral mantén os límites de emisións e as condicións de ensaio existentes aplicables aos vehículos lixeiros. No caso dos vehículos pesados, redúcense os límites de emisións e introdúcense axustes mínimos nas condicións de ensaio. A norma Euro 7 tamén contén unha disposición especial sobre autobuses urbanos para garantir a coherencia co novo obxectivo de cero emisións para estes vehículos, proposto para 2030.

Novos elementos cubertos pola norma Euro 7

A norma Euro 7 establece límites para as emisións distintas ás do tubo de escape, como as partículas procedentes dos freos e os pneumáticos. Ademais, cobre os requisitos mínimos de rendemento en canto á durabilidade das baterías nos vehículos eléctricos e impón requisitos máis estritos no que respecta á vida útil dos vehículos. O Regulamento tamén prevé o uso de tecnoloxías e ferramentas avanzadas de seguimento das emisións.

Mandato do Consello

O Consello suxire unha serie de cambios prácticos na proposta da Comisión, tendo en conta ao mesmo tempo os obxectivos ambientais e sanitarios. Entre outras cousas:

• a posición do Consello mantén as condicións de ensaio e os límites de emisións existentes (establecidos na norma Euro 6) para os vehículos M1 e N1 (turismos e furgonetas particulares);
• no caso dos vehículos M2 e M3 (autobuses e autocares) e N2 e N3 (vehículos comerciais pesados), os límites de emisións redúcense e as condicións de ensaio introdúcense axustes mínimos, en comparación coa norma Euro 6/VI;
• o texto do Consello reforza a harmonización dos límites de emisións das partículas procedentes dos freos e os límites do índice de abrasión dos pneumáticos coas normas internacionais adoptadas pola Comisión Económica para Europa das Nacións Unidas (CEPE);
• ten en conta o novo obxectivo de cero emisións de CO2 proposto para os autobuses urbanos;
• tamén establece prazos claros para a adopción de actos de execución (por parte da Comisión) co fin de proporcionar aos axentes económicos claridade e seguridade xurídica.

Próximas etapas

A orientación xeral acordada hoxe formaliza a posición negociadora do Consello. Proporciona á Presidencia do Consello un mandato de negociación co Parlamento Europeo, que se iniciará tan pronto como o Parlamento adopte a súa posición.

Contexto

O 27 de outubro de 2022, o Consello e o Parlamento Europeo alcanzaron un acordo político provisional sobre normas de rendemento máis estritas en materia de emisións de CO2 para os turismos e furgonetas novos, polo que se estableceu un obxectivo de redución das emisións de CO2 do 100 % para os turismos e furgonetas novos como moi tarde en 2035. Aínda que a industria está a prepararse para este cambio, os turismos e furgonetas de combustión seguirán dispoñibles no mercado ata 2035. Outros vehículos de combustión interna (camións, autobuses e outros vehículos pesados) seguirán fabricándose despois desa data.
A proposta da norma Euro 7 contén normas máis adecuadas en materia de emisións, pero tamén para outros elementos contaminantes, á vez que aborda outras cuestións como a abrasión dos pneumáticos e a vida útil das baterías. Foi presentada pola Comisión o 10 de novembro de 2022 e reúne nun único acto xurídico os obxectivos en materia de emisións dos vehículos de motor lixeiros e pesados, que ata o de agora estaban separados en dous Regulamentos diferentes: o Regulamento (CE) n.º 715/2007 relativo a turismos e furgonetas, e o Regulamento n.º 595/2009 relativo a autobuses, camións e outros vehículos pesados. O Regulamento Euro 7 forma parte da Estratexia de Movilidad Sostenible e Intelixente de 2020 e do Plan de Acción «Contaminación Cero» de 2021 da Comisión.

Máis información:

Consello da UE

Orientación xeral

Proposta da Comisión Europea sobre a norma Euro 7

Ir á páxina da reunión

Infografía- Obxectivo 55: cara a un transporte máis sostible