— A UE busca mobilizar investimento privado para acelerar a transición cara a unha enerxía limpa

Bruxelas, 10 de marzo de 2026. A transición cara a unha enerxía limpa na UE requirirá investimentos anuais de arredor de 660.000 millóns de euros ata 2030, que ascenderán a 695.000 millóns entre 2031 e 2040. Aínda que xa se acadaron avances, é necesario aumentar o ritmo e a escala destes investimentos para garantir unha enerxía segura, accesible e sostible.

Neste contexto, a Comisión Europea adoptou unha nova Estratexia de Investimento en Enerxías Limpas co obxectivo de mobilizar un maior volume de capital privado.

Aínda que o financiamento público seguirá sendo clave, a transición enerxética dependerá principalmente do investimento privado. A estratexia aposta por utilizar fondos públicos como elemento tractor para reducir riscos, facilitar o financiamento e atraer novos investidores, incluíndo grandes institucións financeiras.

O Grupo do Banco Europeo de Investimentos (BEI) comprométese a mobilizar máis de 75.000 millóns de euros nos próximos tres anos para apoiar esta transición.

Principais medidas da estratexia

A estratexia inclúe catro liñas de actuación principais:

• Mellorar o acceso ao financiamento para operadores de redes eléctricas, incluíndo capital propio. O BEI creará un fondo de investimento en infraestruturas estratéxicas con ata 500 millóns de euros.
• Facilitar o acceso ao crédito bancario, promovendo instrumentos como a titulización de préstamos e o financiamento intermediado, especialmente para operadores máis pequenos.
• Apoiar tecnoloxías innovadoras e eficiencia enerxética mediante financiamento público específico que reduza riscos. Isto inclúe o impulso a tecnoloxías aínda non maduras e un programa piloto de 500 millóns de euros para modelos de “eficiencia enerxética como servizo”.
• Crear un Consello de Investimento para a Transición Enerxética, co obxectivo de aliñar as políticas públicas coas necesidades dos investidores e fomentar investimentos a longo prazo.

A Comisión destaca que unha parte importante das reducións de emisións necesarias dependerá de tecnoloxías aínda non dispoñibles no mercado, polo que será fundamental reforzar o apoio á innovación.

Nos vindeiros anos, o marco enerxético e climático da UE, xunto co futuro orzamento europeo e os programas nacionais, servirán como ferramentas clave para impulsar estes investimentos e reducir os seus custos.

Máis información: Comisión Europea