— A presidenta da Comisión Europea, Ursula von der Leyen, presidiu o terceiro diálogo estratéxico sobre o futuro da industria automobilística europea

— Estas iniciativas buscan garantir o liderado de Europa en vehículos eléctricos, acelerar a innovación en vehículos autónomos e conectados e reforzar e industria europea de fabricación de baterías

Bruxelas, 12 de setembro de 2025. A presidenta Ursula von der Leyen presidiu o terceiro diálogo estratéxico sobre o futuro da industria automobilística europea, que reuniu en Bruxelas á industria automobilística europea, os interlocutores sociais e outras partes interesadas. Na reunión reafirmouse a necesidade de actuar con rapidez para aplicar o Plan de Acción para o Automóbil. A medida que a tecnoloxía transforma a mobilidade e a xeopolítica remodela a competencia global, non pode haber continuidade co negocio como de costume.

Dirixidos pola presidenta Von der Leyen, os debates clave centráronse, entre outras cousas, en garantir o liderado de Europa en vehículos eléctricos, acelerar a innovación en vehículos autónomos e conectados e reforzar a industria europea de fabricación de baterías. A Comisión protexe ás empresas europeas contra a competencia desleal, mellora o acceso ás materias primas fundamentais e apoia ás persoas traballadoras mediante a recualificación profesional.

Memorando de entendemento

En canto á innovación, as comisarias Ekaterina Zaharieva e Apostolos Tzitzikostas asinaron un memorando de entendemento coas partes interesadas para acelerar a investigación e a innovación no sector do automóbil a escala da UE, co obxectivo de posicionar a Europa como líder en mobilidade sostible e intelixente de aquí a 2035 e máis aló.

O Memorando de Entendemento une a Asociación 2Zero (centrada no transporte por estrada de emisións cero), a Asociación CCAM (mobilidade conectada, cooperativa e automatizada) e a Asociación BATT4EU (innovación da cadea de valor das baterías) cos seus principais representantes da industria e partes interesadas para abordar as necesidades estratéxicas do sector do automóbil.

Os próximos dous anos son decisivos para acadar o liderado tecnolóxico en vehículos conectados e autónomos. Unha maior cooperación e coordinación das prioridades de investimento son cruciais para o desenvolvemento de software, hardware, modelos de IA e ecosistemas de condución autónoma de fabricación europea. A Alianza Europea de Vehículos Conectados e Autónomos (ECAVA), posta en marcha durante o Diálogo Estratéxico, servirá de foro para establecer unha axenda industrial compartida. A vicepresidenta executiva Henna Virkkunen convocará a primeira reunión a finais de outubro para iniciar o traballo.

O diálogo tamén permitiu á industria europea do automóbil, aos interlocutores sociais e a outras partes interesadas clave contribuír ás próximas iniciativas da Comisión, incluída a revisión do Regulamento sobre as normas de comportamento en materia de emisións de CO₂ de turismos e furgonetas, a proposta sobre flotas corporativas, a simplificación normativa para os turismos e os vehículos comerciais lixeiros e pesados. As persoas participantes revisaron a aplicación do Plan de Acción, posto en marcha en marzo de 2025, e avaliaron os avances cara a unha industria automobilística europea próspera e unha transición exitosa cara a unha mobilidade limpa.

Antecedentes

A presidenta Von der Leyen puxo en marcha o diálogo estratéxico sobre o futuro da industria do automóbil en xaneiro de 2025 para facer fronte a cambios profundos no sector automobilístico. A industria automobilística europea enfróntase a un contorno en rápida evolución con novas tecnoloxías e unha maior competencia, xunto con incertezas xeopolíticas. Os diálogos anteriores coa presidenta Von der Leyen tiveron lugar o 30 de xaneiro de 2025 e o 3 de marzo de 2025.

O 5 de marzo de 2025, a Comisión presentou un Plan de Acción baseado no diálogo estratéxico, no que se detallan medidas concretas para garantir un sector do automóbil sólido e sostible e liberar o seu poder innovador. O Plan de Acción é o resultado dun proceso inclusivo e colaborativo, que implicou múltiples debates e a participación das partes interesadas iniciada a través do Diálogo Estratéxico. O plan tamén se baseou nas conclusións dunha consulta pública aberta sobre o futuro da industria automobilística europea, así como no traballo de varios grupos de traballo dirixidos polos comisarios Šefčovič, Hoekstra, Séjourné, Virkkunen, Mînzatu e Tzitzikostas.

Máis información: Comisión Europea