— Entre os proxectos seleccionados, atópanse oito propostas españolas; unha delas planificada en Galicia.

— Os gañadores producirán hidróxeno renovable en Europa cunha subvención que axudará a cubrir a diferenza de prezos entre os seus custos de produción e o prezo de mercado.

Bruxelas, 20 de maio de 2025. A Comisión anunciou hoxe a selección de quince proxectos de produción de hidróxeno renovable para o seu financiamento público en todo o Espazo Económico Europeo (EEE). Agárdase que os proxectos, situados en cinco países, produzan case 2,2 millóns de toneladas de hidróxeno renovable en dez anos, evitando máis de 15 millóns de toneladas de emisións de CO2. O hidróxeno producirase en sectores como o transporte, a industria química ou a produción de metanol e amoníaco. Recibirán un total de 992 millóns de euros de financiamento da UE, procedentes do Fondo de Innovación procedente do réxime de comercio de dereitos de emisión da UE (RCDE).

Os licitadores gañadores, adxudicados trala segunda poxa do Banco Europeo do Hidróxeno (EHB), producirán o hidróxeno renovable en Europa cunha subvención que axudará a pechar a diferenza de prezos entre os seus custos de produción e o prezo de mercado e acelerará o  despregamento de combustibles máis limpos.

As poxas do Banco Europeo do Hidróxeno contribúen a expandir o hidróxeno renovable, o que á súa vez axudará a substituír o gas natural, o carbón e o petróleo en industrias e sectores do transporte difíciles de descarbonizar. A produción de máis hidróxeno renovable reducirá o uso de combustibles fósiles no noso continente, aumentará a independencia enerxética da UE e terá un impacto positivo na seguridade, o emprego a a descarbonización da industria europea.

Dos proxectos seleccionados, 12 comprometéronse a producir hidróxeno renovable cun apoio fixo premium de entre 0,20 e 0,60 euros por quilo. Por primeira vez, a poxa proporcionou un orzamento específico para os produtores de hidróxeno con compradores no sector marítimo, que son entidades que utilizan o hidróxeno producido polo proxecto para levar a cabo ou facer uso de actividades de abastecemento de combustible. Isto deu lugar á selección de tres ofertas que reciben 96,7 millóns de euros en subvencións. Estes proxectos requirirán entre 0,45 e 1,88 euros por quilo. Cada subvención para os 15 proxectos sitúase entre os 8 millóns de euros e os 246 millóns de euros durante un período de ata 10 anos.

Paralelamente, España, Lituania e Austria están asignando ata 836 millóns de euros en financiamento nacional para proxectos nos seus países a través da función “Poxas como servizo”. Isto permite aos Estados membros identificar e financiar proxectos admisibles nos seus territorios que cumpran os criterios de cualificación da poxa, pero que non poidan ser financiados polo Fondo de Innovación debido a limitacións orzamentarias. As poxas como servizo están abertas a todos os Estados membros, o que lles permite beneficiarse da plataforma de poxas a escala da UE e conceder financiamento nacional a proxectos adicionais cun procedemento simplificado.

Entre os proxectos seleccionados, atópanse oito propostas españolas; unha delas planificada en Galicia.

Próximos pasos

Invitarase agora aos proxectos seleccionados a preparar o seu acordo de subvención coa Axencia Executiva Europea de Clima, Infraestruturas e Medio Ambiente (CINEA). Agárdase que os acuerdos se asinen antes de setembro/outubro de 2025.

Os proxectos asinados deben acadar o peche financeiro nun prazo máximo de dous anos e medio a partir da sinatura e comezar a producir hidróxeno renovable nun prazo de cinco anos. Recibirán a subvención de prima fixa durante un período de ata dez anos para a produción certificada e verificada de hidróxeno renovable. Como se anunciou no Pacto Industrial Limpo, está prevista unha terceira poxa do Banco Europeo do Hidróxeno para finais de 2025 cun orzamento de ata 1 000 millóns de euros.

A Comisión tamén porá en marcha en breve o Mecanismo do Hidróxeno no marco do Banco Europeo do Hidróxeno. Esta plataforma en liña reunirá compradores e vendedores e permitirá aos participantes no mercado compartir información e atopar posibles socios comerciais.

Contexto

Cun orzamento total estimado de 40.000 millóns de euros procedente do réxime de comercio de dereitos de emisión da UE para o período 2020-2030, o Fondo de Innovación crea incentivos financeiros para que as empresas e as autoridades públicas invistan en tecnoloxías de vangarda de emisións netas cero e apoien a transición de Europa cara á neutralidade climática.

O Banco Europeo do Hidróxeno facilita a produción nacional na UE e as importacións de hidróxeno renovable que cualifica como combustibles renovables de orixe non biolóxica (RFNBO), o que significa que se xera utilizando electricidade renovable e cumpre cos criterios de sustentabilidade da UE. Apoia o obxectivo da UE de producir 10 millóns de toneladas de hidróxeno renovable nacional de aquí a 2030, tal como se establece no plan REPowerEU. O seu obxectivo é desbloquear o investimento privado na UE e en terceiros países, abordando os retos de investimento, reducindo o déficit de financiamento e conectando o futuro subministro de hidróxeno renovable cos consumidores. Na súa primeira poxa en 2023, o Fondo de Innovación concedeu preto de 700 millóns de euros en subvencións para apoiar seis proxectos.

Fonte: Comisión Europea