— Os participantes visitaron as principais institucións comunitarias e recibiron formación sobre financiamento comunitario.

— O director xeral de Relacións Exteriores e coa UE, Jesús Gamallo, foi o encargado de inaugurar a 22ª edición de TecEuropa, que reuniu a 25 participantes.

Bruxelas, 27 de xuño de 2025. A Fundación Galicia Europa acolleu esta semana en Bruxelas a vintecinco profesionais galegos de entidades públicas e privadas no marco da 22ª edición do programa TecEuropa, o curso de referencia en financiamento comunitario en Galicia. A maioría dos participantes procedían do ámbito público (concellos, deputacións, administración autonómica, universidades…).

A Fundación Finnova, especializada no financiamento da innovación en empresas, rexións e municipios europeos, encargouse de dúas sesións formativas con claves para presentarse a convocatorias de programas como Erasmus ou Life, ademais de consellos xerais para preparar as candidaturas. 

Os participantes puideron visitar o Parlamento Europeo, onde realizaron unha visita guiada e puideron coñecer de primeira man a historia e a actividade desta cámara colexislativa da UE. No Comité Europeo das Rexións aprenderon sobre o seu funcionamento e a participación de Galicia nel. Os asistentes visitaron tamén o Comité Económico e Social.

“Un programa máis vixente ca nunca” 

O director xeral de Relacións Exteriores e coa UE, Jesús Gamallo, foi o encargado de inaugurar o mércores 25 de xuño o curso. Na súa intervención, explicou que a intención deste programa é dar aos seus participantes a oportunidade de reflexionar, combinando a perspectiva europea coa rexional e local, sobre como se poden afrontar dende Galicia os retos actuais da UE, como a soberanía estratéxica, a transformación dixital, o cambio demográfico ou a transición enerxética e ecolóxica, dende o punto de vista dos fondos e programas de financiamento que acompañan a estas políticas.

Gamallo salientou que, logo de dez anos, máis de vinte edicións e máis de mil participantes, o interese neste programa está máis vixente que nunca. A sesión inaugural, que contou tamén coa presenza do secretario xeral técnico da Consellería de Presidencia, Xustiza e Deportes, Javier Abad, e da directora xeral de Mobilidade, Judit Fontela, continuou cunha presentación na que se afondou no labor da FGE como oficina de representación dos intereses galegos perante a UE.

Casi unha década de TecEuropa

Máis información: Xunta de Galicia