Actualidade
Portada » Actualidade » Novas » Unión Europea » Enerxía »Panel de cidadáns europeos para debater sobre a eficiencia enerxética
— Arrancou en Bruxelas un novo Panel de Cidadáns Europeos, formado por 150 cidadáns seleccionados ao azar dos 27 Estados membro.
— O obxectivo é debater sobre as vantaxes e os retos de aumentar a eficiencia enerxética, e sobre como deben actuar os fogares, as empresas e as comunidades.
Bruxelas, 23 de febreiro de 2024. O aforro de enerxía desempeñou un papel crave na loita contra a crise enerxética e é un compoñente importante do Pacto Verde Europeo e do noso plan para alcanzar a neutralidade climática en 2050.
Ao longo de tres fins de semana, os cidadáns formularán recomendacións que influirán nas futuras políticas da UE e alimentarán unha Recomendación da Comisión sobre o principio de “eficiencia enerxética ante todo” que se dirixirá aos Estados membro.
O panel complementarase cunha nova Plataforma de Participación Cidadá, unha plataforma en liña de fácil acceso que permitirá a todos os cidadáns da UE unirse ao debate e sentarse á mesa.
Proporcionará un foro para que todos os cidadáns da UE compartan as súas ideas e intercambien con outros sobre temas de importancia para a UE, nas 24 linguas oficiais da UE.
As sesións plenarias do Panel de Cidadáns Europeos retransmitiranse por Internet os días 23 e 25 de febreiro na plataforma. En 2024 celebraranse outros paneis de cidadáns.
Contexto
O Panel de Cidadáns Europeos e a nova Plataforma de Participación Cidadá en liña responden as peticións dunha maior participación cidadá na elaboración das políticas da UE que se fixeron durante a Conferencia sobre o Futuro de Europa.
Seguindo a prioridade da Presidenta Ursula von der Leyen de construír unha democracia europea preparada para o futuro, os paneis de cidadáns europeos e as ferramentas de participación cidadá en liña incorporáronse como elementos habituais da vida democrática da UE.
Os paneis de cidadáns europeos permiten aos participantes traballar xuntos en grupos de 12 e en sesións plenarias. Un equipo de facilitación proporciona apoio, xunto cun comité de expertos que achegan información adicional.
Os participantes nos paneis de cidadáns europeos selecciónanse ao azar mediante ferramentas que xeran números de teléfono fixos e móbiles válidos de forma aleatoria.
Para garantir que os Paneis reflictan a composición sociodemográfica de Europa, o proceso garante que o recrutamento sexa representativo da diversidade da UE.
Un sistema de cotas garante un panel equilibrado entre homes e mulleres e especifica que os mozos de entre 16 e 25 anos deben representar un terzo do panel. Outras características sociodemográficas refírense ao nivel educativo, a localización xeográfica e a ocupación.
A Plataforma de Participación Cidadá é unha peza crave dun novo ecosistema de participación cidadá, que adopta a forma en liña do portal renovado “Diga o que pensa”, cumprindo un compromiso da comunicación de seguimento da Conferencia sobre o Futuro de Europa.
Máis información: Comisión Europea
