Actualidade

Portada » Actualidade » Novas » Actividades FGE » Bolsas FGE » Os novos bolseiros da Fundación Galicia Europa comezan a súa formación en Bruxelas

Os novos bolseiros da Fundación Galicia Europa comezan a súa formación en Bruxelas

07/09/2023 |

— A través destas bolsas anuais, persoas tituladas galegas poden especializarse en temas europeos como o financiamento ou a elaboración de políticas e lexislación comunitaria.

— Durante os seus case 30 anos de funcionamento, a iniciativa beneficiou a máis de 500 persoas.

Bruxelas, 7 de setembro de 2023. A Fundación Galicia Europa (FGE), a representante da Xunta ante a Unión Europea, forma a cinco novos bolseiros na súa oficina de Bruxelas. Tras a súa incorporación o pasado luns, día 4 de setembro, recibiron hoxe a visita do director xeral de Relacións Exteriores coa UE, Jesús Gamallo.

Catro das persoas seleccionadas integraranse durante once meses no equipo da FGE para levar a cabo prácticas relacionadas co seguimento e información das políticas comunitarias e coa participación de Galicia nos asuntos europeos. A quinta bolseira, especializada no ámbito da I+D+i, realizará unhas prácticas de doce meses grazas a un acordo de colaboración subscrito coa Axencia Galega de Innovación.

Das cinco bolsas convocadas este ano, catro están dirixidas a titulados universitarios e unha a titulados superiores de formación profesional no ámbito da administración. As catro mozas e o mozo escollidos superaron un proceso de selección ao que se presentaron máis de 30 candidaturas, consistente nunha valoración de méritos e unha entrevista.

Trátase dunha iniciativa anual da Fundación Galicia Europa que lle permite á mocidade galega completar e enriquecer a súa formación no ámbito europeo. O seu obxectivo é facilitarlle a mobilidade e o acceso ao mercado laboral á poboación nova, ademais de darlle a oportunidade de traballar nunha contorna europea e multicultural.

Unha iniciativa de formación con case 30 anos de historia

Dende que a Fundación Galicia Europa puxo en marcha a iniciativa, hai case 30 anos, máis de 500 persoas se beneficiaron dalgunha das modalidades de bolsas ofertadas. Moitas delas traballan hoxe na administración comunitaria e en diversas entidades galegas especializadas na xestión de proxectos europeos.

Cómpre sinalar que a formación e sensibilización sobre Europa en Galicia é un dos catro grandes ámbitos de actuación da FGE, xunto coa defensa dos intereses galegos ante a Unión Europea, a promoción da participación en proxectos europeos e a información sobre a UE en Galicia.

Consulta neste enlace a resolución da adxudicación das bolsas.

Máis información: Fundación Galicia Europa

Buscador

  • Categoría

  • Subcategoría

  • Etiqueta

  • Data