— O conselleiro de Presidencia, Diego Calvo, presidiu a reunión do padroado da Fundación Galicia Europa (FGE), a entidade que representa a Galicia ante as institucións comunitarias

— Na súa intervención, destacou como principais obxectivos para 2025 a defensa dunha política de cohesión que atenda as necesidades das rexións e a aposta por unha transición xusta na industria do automóbil e no resto de sectores produtivos

Santiago de Compostela, 20 de decembro de 2024. O conselleiro de Presidencia, Xustiza e Deportes, Diego Calvo, presidiu esta mañá a reunión do padroado da Fundación Galicia Europa (FGE), a entidade que exerce a representación autonómica galega ante a UE. Na súa intervención, destacou o “frutífero” que foi o 2024 para Galicia a nivel europeo e aproveitou para marcar as prioridades da Xunta nese mesmo ámbito para o ano que vén.

O conselleiro avanzou que o Goberno galego, a través da FGE, defenderá ante as institucións comunitarias unha política de cohesión simplificada que sitúe ás rexións no centro do seu deseño e aplicación, velará por unha transición xusta na industria do automóbil e defenderá o equilibrio entre as dimensións medioambiental, económica e social dos sectores produtivos.

En relación co ano que remata, Diego Calvo destacou como Galicia, co apoio da FGE, acadou en 2024 tres galardóns promovidos polas institucións comunitarias. O Comité Europeo das Rexións (CdR) nomeou á nosa comunidade como Rexión Emprendedora Europea 2025, mentres a Comisión outorgou senllos recoñecementos á rede de sendas peonís e ciclistas das estradas da Xunta, e ao software EMi, que promove oportunidades laborais no Servizo Público de Emprego galego da man da intelixencia artificial. Tamén salientou que, como reclamara activamente Galicia, a nova Comisión Von der Leyen conta cun comisario específico de pesca.

Gamallo destacou o labor da Fundación na participación de Galicia no Comité Europeo das Rexións e nas visitas institucionais de responsables da Xunta

Pola súa banda, o director xeral de Relacións Exteriores e coa UE, Jesús Gamallo, destacou o labor de apoio, asesoramento e acompañamento que realiza a FGE na participación de Galicia no Comité Europeo das Rexións e nas visitas institucionais de responsables da Xunta a Bruxelas. O director xeral confirmou que, ademais disto, a FGE seguirá celebrando mensualmente os ‘Encontros virtuais Xunta-UE’, un foro de debate entre a administración galega e as institucións europeas.

Tamén seguirá organizando novas edicións de ‘TecEuropa’, o programa de especialización en financiamento comunitario de referencia en Galicia. Este ano recuperouse con éxito a modalidade presencial, tralo parón durante a pandemia. A FGE reeditará, ademais, as catro bolsas anuais de formación para mozos galegos na oficina da entidade en Bruxelas, ademais da convocada en colaboración con GAIN, a Axencia Galega de Innovación.

Contexto

A Fundación Galicia Europa (FGE) é un ente instrumental do sector público autonómico que actúa dende 1988 como punta de lanza da participación galega nos asuntos europeos. A Lei 10/2021 reguladora da acción exterior de Galicia recolle o seu mandato para “exercer a representación autonómica galega ante as institucións e órganos da Unión Europea seguindo as directrices do Goberno autonómico e respectando os principios de unidade de acción exterior do Estado”. O seu padroado está formado pola Xunta de Galicia, a Axencia Galega de Innovación, Abanca, o Consorcio da Zona Franca de Vigo e as Deputacións da Coruña e Lugo.

Os catro ámbitos de actuación da FGE son: a defensa dos intereses de Galicia ante a UE, a promoción da participación galega en proxectos europeos, a difusión de información sobre a UE en Galicia e a formación sobre as institucións comunitarias. Para a consecución destes obxectivos, a entidade conta con dúas oficinas, unha en Santiago de Compostela e outra en Bruxelas, formando parte esta última das máis de 200 representacións rexionais establecidas na capital comunitaria.

Máis información:

A Xunta fixa as súas prioridades no ámbito europeo para o ano que vén (Xunta)