— O informe da Comisión Europea pon de manifesto a situación de vulnerabilidade da xuventude en materia de emprego, sendo a máis prexudicada pola perda de postos de traballo

Santiago de Compostela, 12 de xullo de 2022. A Comisión vén de publicar a edición 2022 do seu estudo sobre a evolución social e do emprego en Europa (ESDE). Entre outras conclusións, este informe pon de manifesto que, durante a crise económica provocada pola pandemia de COVID-19, os mozos atopáronse entre os máis prexudicados pola perda de postos de traballo. Tamén pon de manifesto que a recuperación foi máis lenta para eles que para outros grupos de idade. As posibles explicacións teñen que ver coa elevada porcentaxe de contratos de duración determinada e coas dificultades para atopar un primeiro emprego tras acabar o colexio, a universidade ou a formación. O novo informe axuda a determinar, e apoia, as políticas sociais e de emprego necesarias para facer fronte aos retos aos que se enfrontan os mozos para ser economicamente independentes, ante o empeoramento da situación socioeconómica como consecuencia da invasión de Ucraína por parte de Rusia.  

O estudo ESDE, baseado nos últimos datos anuais, conclúe o seguinte:

• A recuperación da pandemia de COVID-19 non foi homoxénea. Os mozos (menores de 30 anos) seguen tendo grandes dificultades á hora de buscar traballo ou para atopar un emprego que se adapte ás súas capacidades e experiencia. En 2021, o desemprego xuvenil diminuíu, especialmente cara a finais de ano, non obstante mantívose 1 punto porcentual por encima do valor anterior á crise (en 2019). Dos mozos ocupados, practicamente 1 de cada 2 (o 45,9 %) tiña un contrato temporal, fronte a 1 de cada 10 no caso de todos os traballadores (10,2 %). 

• Os mozos, de media, teñen máis probabilidades de atoparse nunha situación social e financeira complicada. Xa antes da pandemia, os ingresos por traballo dos mozos eran máis volátiles que os dos traballadores de máis idade. Os fogares con mozos á cabeza experimentaron máis pobreza, aínda que as diferenzas entre os distintos países da Unión foron notables. Os mozos tiveron dificultades para facer fronte aos seus gastos cotiáns, como facturas e alugueiros, e ao 61 % preocupáballe atopar ou conservar unha vivenda adecuada nos dez anos seguintes.

• Os retos aos que se enfrontan os mozos dependen do seu nivel educativo e do seu contexto socioeconómico. As probabilidades que teñen de acabar nunha situación na que nin traballan nin estudan nin reciben formación os mozos con educación secundaria sitúanse 19 puntos porcentuais por baixo das dos que teñen un nivel de educación inferior. No caso dos que teñen unha educación terciaria, este risco sitúase 28 puntos porcentuais por baixo. Os mozos procedentes de contornas desfavorecidas teñen aínda menos probabilidades de traballar, estudar ou formarse.

• O sexo é outro factor que provoca desigualdade entre os mozos. As mozas da Unión, ao comezo das súas carreiras profesionais, gañan máis ou menos un 7,2% menos que os seus compañeiros, unha diferenza que se acentúa coa idade. A nivel da Unión, tan só unha pequena proporción desta diferenza (0,5 puntos porcentuais) é consecuencia dos logros educativos das mulleres, a elección profesional, a experiencia laboral ou o tipo de contrato de traballo que teñen. 

Políticas adecuadas para axudar aos mozos a nivel da Unión

O estudo ESDE ofrece unha análise baseada en datos sobre como abordar os retos aos que se enfrontan os mozos. En particular, as políticas sociais e de emprego deberían:

• mellorar a integración dos mozos no mercado de traballo,

• permitir aos mozos adquirir capacidades,

• apoiar a mobilidade laboral, un elemento fundamental para o éxito e a resiliencia da carreira profesional,

• reducir os riscos para os mozos, como o desemprego ou a enfermidade, a pobreza e a débeda,

• axudar aos mozos para crear a súa propia riqueza e a adquirir propiedades.

Están a prepararse novas iniciativas da Unión para axudar aos mozos. En 2023, a Comisión ten previsto revisar a Recomendación do Consello sobre un marco de calidade para os períodos de prácticas, en particular polo que respecta ás condicións de traballo. Na actualidade, un grupo de alto nivel está a estudar maneiras de mellorar a protección social, tamén para os mozos, e ten previsto presentar as súas conclusións a principios do próximo ano.

Contexto

O estudo anual sobre a evolución social e do emprego en Europa (ESDE) é o informe emblemático analítico da Comisión Europea sobre emprego e asuntos sociais. Proporciona análises económicas actualizadas e propostas conexas.

Máis información

Empleo: Los jóvenes, entre los más afectados por la pérdida de puestos de trabajo como consecuencia del impacto económico de la COVID-19