Bruxelas, 29 de marzo de 2022. – A Comisión decidiu activar novas medidas de crise para apoiar aos sectores da pesca e a acuicultura no contexto da invasión rusa de Ucraína.

O mecanismo de crise do Fondo Europeo Marítimo, da Pesca e da Acuicultura (FEMPA) achegará un alivio inmediato aos operadores dos sectores da pesca, a acuicultura e a transformación de produtos do mar mediante unha compensación financeira polas súas perdas económicas e custos adicionais. Permitirá aos Estados membros conceder unha compensación financeira aos operadores polas perdas de ingresos debidas á actual perturbación do mercado, así como unha ”axuda ao almacenamento” ás organizacións de produtores. Esta medida súmase ao Marco Temporal de Crise, que permite aos Estados membros prestar apoio mediante axudas estatais.

• Compensación financeira aos operadores dos sectores da pesca, a acuicultura e a transformación polas perdas de ingresos e os custos adicionais derivados da actual perturbación do mercado. Os custos enerxéticos adicionais poden ser cubertos pola compensación se están vinculados á perturbación do mercado causada pola agresión militar de Rusia contra Ucraína.

• Compensación financeira ás organizacións de produtores se aplican o mecanismo de almacenamento da organización común de mercados (”axuda ao almacenamento”). Este mecanismo permite ás organizacións de produtores almacenar os produtos dos seus membros como forma de garantir un nivel de prezos satisfactorio no mercado.

Debido ao impacto da agresión militar de Rusia contra Ucraína toda a frota da UE está a deixar de ser rendible. Os buques pesqueiros que operan no Mar Negro tamén se enfrontan á ameaza de posibles actividades militares, o que lles leva a suspender a súa actividade por precaución. Ademais, os sectores da acuicultura e a transformación vense prexudicados polo aumento dos custos da enerxía e as materias primas, así como polos elevados custos loxísticos e de transporte. Prevese que o mercado do peixe se enfrontará a un choque negativo da oferta, tanto de produtos pesqueiros frescos (da UE) debido ás decisións de non saír ao mar, como de determinados produtos transformados ou en conserva como consecuencia da escaseza de materias primas.