Novas da UE

Bruxelas, 27 de novembro de 2019. Concluído o proceso de audiencias aos comisarios, o Parlamento Europeo deu o seu visto bo no pleno de hoxe en Estrasburgo á nova Comisión Europea liderada pola política alemá Ursula von der Leyen. Tras a presentación de Ursula von der Leyen do seu equipo, os eurodeputados confirmaron en votación nominal o seu respaldo ao colexio de comisarios no seu conxunto, con 461 votos a favor, 157 en contra e 89 abstencións.

Durante a súa intervención ante a Eurocámara, a presidenta electa reiterou a maioría dos compromisos asumidos en xullo, e polos candidatos a comisario ao longo do proceso de audiencias. Asegurou que a UE contará co investimento e a lexislación apropiada para liderar internacionalmente en ámbitos como a protección ambiental e o cambio climático, o crecemento, a inclusión, a innovación e dixitalización, a protección da democracia, os valores europeos, os dereitos dos cidadáns e o Estado de dereito.

Tamén confirmou un cambio de competencias que os eurodeputados solicitaran durante as audiencias aos candidatos a comisarios.

Antes da votación, os grupos políticos reuníronse brevemente para decidir o sentido do seu voto. Posteriormente, os líderes dos grupos interviñeron ante o pleno para xustificar a súa postura na votación de investidura.

Cabe apuntar que a representación feminina na nova Comisión é a máis elevada na historia da institución. Ademais da presidenta, o novo equipo contará con 11 mulleres e 15 homes.

Tras a luz verde por parte do Parlamento, a nova Comisión Europea debe ser nomeada formalmente polos xefes de Estado e de Goberno. O seu mandato de cinco anos comezará o próximo 1 de decembro.

Fonte: Parlamento Europeo