Subscríbete!

Se queres recibir a actualidade da UE no teu correo: noticias, convocatorias, procura de socios...

Preme Aquí


Axenda FGE

Aluguer de sala

Transparencia

Convocatorias UE



Síguenos en Twitter Síguenos en Facebook Síguenos en linkedin

05/11/2020

Nova proposta de Directiva sobre salarios mínimos adecuados na Unión Europea

5178F_1604566321_markus-spiske-ms6N-gBtbCQ-unsplash__2_.jpg
Malia que en todos os Estados membros existe un salario mínimo, ben por lei ou por negociación colectiva, un 10% dos traballadores vive por debaixo do limiar da pobreza. A proposta da Comisión pretende establecer unhas normas comúns para garantir uns salarios mínimos adecuados en toda a UE, aínda que sen fixar unha contía mínima común. Tamén ten por obxectivo estender a negociación colectiva sobre o salario mínimo aos 21 países nos que este se fixa por lei, como é o caso de España.

Bruxelas, 5 de novembro de 2020. A Comisión vén de propoñer unha Directiva para garantir que os traballadores da UE estean amparados por salarios mínimos adecuados que lles permitan vivir dignamente onde queira que traballen. Cando existen salarios mínimos cunha contía adecuada, teñen un impacto social positivo, achegan beneficios económicos máis amplos, axudan a manter a demanda interna, reforzan os incentivos para traballar e poden axudar a reducir a brecha salarial de xénero. Ademais, ao garantir unha competencia leal, a proposta contribúe á protección dos empregadores que pagan salarios dignos aos seus traballadores.
A crise actual afectou especialmente aos sectores cunha maior proporción de traballadores con salarios baixos, como a limpeza, a venda polo miúdo, a sanidade, a atención por dependencia e a atención residencial. Asegurar unha vida digna aos traballadores e reducir a pobreza das persoas que traballan non só é importante durante a crise, senón que tamén é esencial para que se produza unha recuperación económica sostible e inclusiva.

Un marco para os salarios mínimos que respecte as competencias e tradicións nacionais
En todos os Estados existen salarios mínimos. 21 países contan con salarios mínimos legais e en seis, a protección do salario mínimo garántese exclusivamente por medio de convenios colectivos. Con todo, na maioría deles, os traballadores sofren unhas contías insuficientes ou unha cobertura deficitaria da protección que ofrecen. En vista diso, a Directiva crea un marco para mellorar a adecuación dos salarios mínimos e o acceso dos traballadores á protección dos mesmos así como pretende promover a negociación colectiva salarial en todos os Estados membros. 

A proposta respecta plenamente o principio de subsidiariedade: establece un marco para unhas normas mínimas e respecta as competencias dos Estados, así como a autonomía e a liberdade contractual dos interlocutores sociais no ámbito salarial. Ademais, non obriga a introducir salarios mínimos legais nin fixa ningunha contía mínima común.

Os países con salarios mínimos legais deben establecer as condicións para que estes salarios teñan a contía adecuada. Estas condicións inclúen uns criterios claros e estables para fixar o salario mínimo, uns valores de referencia indicativos para avaliar a súa adecuación e unhas actualizacións periódicas cando corresponda. Tamén se pide a estes Estados que garantan o uso proporcionado e xustificado das variacións e deducións do salario mínimo e a participación efectiva dos interlocutores sociais na fixación e actualización do salario mínimo legal.

Os países cunha gran cobertura de negociación colectiva tenden a ter unha proporción menor de traballadores con salarios baixos, menos desigualdade salarial e uns salarios mínimos máis elevados. Por tanto, a proposta da Comisión pretende promover a negociación colectiva salarial en todos os Estados membros.
Por último, a proposta prevé unha mellor aplicación e supervisión da protección que ofreza o salario mínimo en cada país. Por tanto, a Directiva introduce a presentación de informes anuais á Comisión por parte dos Estados sobre os seus datos relativos á protección do salario mínimo.

Antecedentes
A presidenta Von der Leyen prometeu ao comezo do seu mandato presentar un instrumento xurídico para garantir que os traballadores da Unión se beneficien dun salario mínimo, e reiterou a súa promesa no seu discurso sobre o estado da Unión. O dereito a un salario mínimo adecuado conságrase no principio 6 do piar europeo de dereitos sociais, que proclamaron conxuntamente en Gotemburgo, en novembro de 2017, o Parlamento Europeo, o Consello e a Comisión Europea.
Esta proposta preséntase tras a celebración dunha consulta en dúas fases cos interlocutores sociais. Agora a proposta da Comisión vai transmitirse ao Parlamento Europeo e ao Consello para a súa adopción. Unha vez adoptada a Directiva, os Estados dispoñerán dun prazo de dous anos para incorporala ao seu ordenamento xurídico nacional.

Para máis información: Comisión Europea
A proposta da Comisión de Directiva da UE sobre salarios mínimos adecuados na UE.
O documento de traballo dos servizos e a avaliación de impacto que acompaña a proposta da Comisión
Palabras de apertura do Comisario Schmit 
Palabras de apertura do vicepresidente executivo Dombrovskis 


Sello AYS Innova entidad adaptada

© Fundación Galicia Europa

Inicio Contacto Mapa Web Política de privacidad Política de Cookies Perfil de contratante